Muxtar respublikamızda ekoloji tarazlığın qorunması, yeni yaşıllıq sahələrinin həcminin artırılması istiqamətində həyata keçirilən tədbirlər uğurla davam etdirilir.
Noyabrın son həftəsinə təsadüf edən növbəti şənbə iməciliklərində də yeni yaşıllıq zolaqlarına aqrotexniki qulluq göstərilməsi, eyni zamanda belə sahələrin həcminin genişləndirilməsi diqqət mərkəzində saxlanılıb. Belə ki, Naxçıvan şəhər sakinləri tərəfindən Uzunoba Su Anbarının ətrafında 3 hektarlıq ərazidə 2500 ədəd meyvə ağacı əkilib, müəssisə və təşkilatların ərazilərindəki yaşıllıqlara aqrotexniki qulluq göstərilib.
Muxtar respublikanın ən böyük rayonlarından biri olan Şərur rayonunda, Naxçıvan-Sədərək magistral yolunun Zeyvə, Mahmudkənd və Cəlilkənd hissəsində 1500 ədəd meşə ağacı əkilib.
Babək rayonunun Şəkərabad və Hacıvar kəndləri ərazisində 120 ədəd həmişəyaşıl ağac, Naxışnərgiz kəndində 380 ədəd meyvə ağacı əkilib.
Bağlar diyarı Ordubad rayonundakı iməciliklərdə də aktivlik qeydə alınıb. Belə ki, Naxçıvan-Ordubad magistral yolunun Dəstə kəndi ərazisində 60 ədəd meyvə, rayonun digər ərazilərində 1450 ədəd meyvə, 300 ədəd meşə ağacı əkilib. Həmin magistral yolun Culfa rayonu hissəsində isə 620 ədəd meşə, Bənəniyar kəndində 620 ədəd gül kolu və 8 ədəd həmişəyaşıl ağac, Culfa şəhərində 270 meyvə ağacı əkilib.
Kəngərli rayonunda isə Naxçıvan-Sədərək magistral yolunun kənarlarında 1000 ədəd, Xok kəndindəki 1 hektarlıq ərazidə yeni salınmış bağda 500 ədəd meyvə ağacı əkilib.
Şahbuz rayonundakı Kardaş massivində 0,7 hektarlıq ərazidə 450 ədəd meyvə, Badamlıq massivində 0,5 hektarlıq ərazidə 210 ədəd meyvə ağacı, Şahbuz şəhəri ərazisində isə 300 ədəd gül kolu və 200 ədəd həmişəyaşıl ağac əkilib.
Sədərək rayonunun mərkəzi Heydərabad qəsəbəsindəki park və xiyabanlarda, həmçinin Qaraağac kəndinə gedən yolun kənarlarında 300 ədəd meyvə ağacı, 300 ədəd gül kolu və 100 ədəd həmişəyaşıl ağac əkilib.
Həmin gün muxtar respublikanın bütün şəhər və rayonlarında ahıl vətəndaşların həyətlərində təmizlik-abadlıq işləri aparılıb.
Xəbərlər şöbəsi
