Növbəti iməciliklərdə 2350 ədəd gül və bəzək kolu, meyvə və həmişəyaşıl ağaclar əkilmişdir
Muxtar respublikamızda son illərdə yaşıllıq sahələrinin həcminin dəfələrlə artması, yurdumuzun yaşıllıqlar məskəninə çevrilməsi həyata keçirilən məqsədyönlü tədbirlər hesabına mümkün olub. Bu sahədə görülən işlərin kəmiyyət və keyfiyyətinin yüksəldilməsi istiqamətində görülən tədbirlər davamlı xarakter almış, yeni əkilən ağacların suvarılmasında damcı üsulunun tətbiqi genişləndirilmiş, xeyli meyvə bağları, yaşıllıq zolaqları salınmış, ekoloji tarazlığın qorunmasında müstəsna rola malik olan belə tədbirlərin həyata keçirilməsi prioritet vəzifəyə çevrilmişdir.
Cari ilin payız günlərində də bu tədbirlər mütəşəkkilliklə davam etdirilir, meyvə bağlarına, yaşıllıq zolaqlarına, gülkarlıq sahələrinə aqrotexniki qulluq göstərilməsi diqqət mərkəzində saxlanılır.
Sentyabrın 27-də keçirilən iməciliklər də yüksək səviyyədə təşkil olunmuşdu.
Naxçıvan şəhərinin sakinləri Babək rayonunun Nəzərabad kəndi yaxınlığındakı terrasda, Naxçıvan-Sədərək magistral yolunun kənarında yaşıllıqlara aqrotexniki qulluq göstərmiş, park və xiyabanlarda təmizlik işləri aparmışlar.
Şərur rayonunda Naxçıvan-Sədərək magistral yolunun kənarlarında, Axura yolunun Həmzəli kəndi hissəsində, Sərxanlı kəndində, rayonun park və xiyabanlarında yaşıllıqlara aqrotexniki qulluq göstərilmiş, Axura yolunun kənarlarında 150 ədəd meyvə ağacı əkilmişdir.
İməcilik günü Babək rayonunun ərazisində də qələbəlik müşahidə edilmişdir. Bölgə sakinləri Naxçıvan-Ordubad və Naxçıvan-Şahbuz magistral yolunun ətrafında, Əshabi-Kəhf ziyarətgahına gedən yolun kənarlarındakı bağlarda suvarma işləri aparmışlar.
Bağlar diyarı Ordubad rayonunda da iməciliklər mütəşəkkilliklə keçirilmiş, Naxçıvan-Ordubad magistral yolunun kənarlarında, Dəstə kəndində, Aşağı Əylis kəndinə gedən yolun kənarlarında, park və xiyabanların ərazilərində yaşıllıqlara aqrotexniki qulluq göstərilmişdir.
Culfalılar Naxçıvan-Ordubad magistral yolunun Culfa şəhəri ərazisində, park və xiyabanlarda yaşıllıqlara aqrotexniki qulluq göstərmiş, rayonun giriş hissəsindəki Bayraq Meydanında 2000 ədəd qızılgül kolu əkilmişdir.
Kəngərli rayonunun sakinləri Naxçıvan-Sədərək magistral yolunun kənarında və Xok kənd tam orta məktəbinin həyətində yaşıllıqlara aqrotexniki qulluq göstərmişlər.
Şahbuz rayonunda Naxçıvan-Batabat magistral yolunun kənarlarında salınmış bağlara aqrotexniki qulluq göstərilmiş, Şahbuz şəhərindəki 2 nömrəli tam orta məktəbin həyətinə 200 ədəd həmişəyaşıl ağac əkilmişdir.
Sədərək rayonunda Heydərabad qəsəbə tam orta məktəbinin və Mərkəzi Xəstəxananın həyətində, Qaraağac kənd yolunun kənarlarında yaşıllıqlara aqrotexniki qulluq göstərilmişdir.
Həmin gün muxtar respublikamızın bütün bölgələrində ahıl vətəndaşların həyətlərində təmizlik, abadlıq işləri aparılmışdır.
Ümumilikdə, iməciliklərdə 24 min 926 nəfər iştirak etmiş, 2000 gül və bəzək kolu, 200 həmişəyaşıl ağac, 150 meyvə ağacı əkilmişdir.
Xəbərlər şöbəsi
