Bu yaxınlarda Bakı şəhərində Abşeron Olimpiya İdman Kompleksində keçirilən V Respublika Uşaq Paralimpiya İdman Oyunlarında iştirak edən muxtar respublika Paralimpiya Federasiyasının təmsilçiləri diyarımıza medallarla qayıdıblar. İdmançılarımızdan Zahir İbrahimov Uşaq Paralimpiya İdman Oyunlarının boccia növünün iki müxtəlif kateqoriyası üzrə yarışın qalibi adını qazanıb. Yarışda iştirak edən federasiyanın digər təmsilçiləri – stolüstü tennis üzrə Nihal İmanov, üzgüçülük müsabiqəsində isə Hüseyn Abdullayev yüksək nəticələr göstərərək bürünc medallara layiq görülüblər.

Bu münasibətlə Naxçıvan Muxtar Respublikası Paralimpiya Federasiyasının təşkilatçılığı ilə V Respublika Uşaq Paralimpiya İdman Oyunlarında uğurlu nəticələr əldə edən sağlamlıq imkanları məhdud uşaqlarla görüş keçirilib. Görüşdə çıxış edən federasiya sədri Nicat Babayev muxtar respublikada idmanın inkişafı üçün yaradılan şəraitdən və əldə edilən uğurlardan danışıb. 

Sonra yüksək nəticələr göstərən sağlamlıq imkanları məhdud uşaqlar hədiyyələr və fəxri fərmanlarla təltif olunub, onların valideynləri göstərilən diqqət və qayğıya görə minnətdarlıqlarını ifadə ediblər.

Naxçıvan Muxtar Respublikası
Əmək və Əhalinin Sosial Müdafiəsi Nazirliyinin mətbuat xidməti