Muxtar respublikada işçilərin əmək hüquqlarının qorunması və müəssisələrdə əməyin mühafizəsinin təşkili istiqamətində ardıcıl tədbirlər həyata keçirilir.
Cari ilin 10 ayı ərzində istehsal və tikinti sahəsində əməyin mühafizəsi və təhlükəsizlik qaydalarına əməl olunmasının vəziyyəti ilə əlaqədar 77 obyektə nəzarət həyata keçirilib. Bu zaman fərdi və kollektiv mühafizə vasitələrindən istifadə etməyən 44 işçi müvəqqəti olaraq tikinti sahəsindən uzaqlaşdırılıb, 95 işçi isə həmin vasitələrlə yerində təmin olunub.
Bəhs olunan dövrdə tikinti aparılacaq meydançalarda müvəqqəti qurğuların qurulması və normal əmək şəraitinin yaradılmasına nəzarət məqsədilə 36 tikinti obyektinə baxış keçirilib və həmin tikinti sahələrində inşaat işlərinə başlanılmasına dair müvafiq akt tərtib edilib.
Bu ilin mart ayında Naxçıvan Muxtar Respublikası “Elektron hökumət” portalında Əmək və Əhalinin Sosial Müdafiəsi Nazirliyinin xidmətlər bölməsinə Əmək Müqaviləsi Bildirişi üzrə Elektron İnformasiya Sistemi əlavə edilib. İşəgötürən və işçilərin əmək müqaviləsi bildirişi üzrə elektron informasiya sistemindən istifadəsinə kömək məqsədilə nazirlikdə “255” nömrəli qaynar xətt yaradılıb. On ay ərzində “255” nömrəli qaynar xəttə 126 müraciət daxil olub və müraciət edənlərin sualları qanunamüvafiq qaydada cavablandırılıb.
Ötən dövr ərzində muxtar respublika üzrə “Əmək müqaviləsi bildirişlərinin qeydiyyata alınması və bu barədə işəgötürənə məlumat verilməsi” elektron xidməti vasitəsi ilə elektron informasiya sisteminə 833 müəssisə tərəfindən 24 min 837 əmək müqaviləsi bildirişi daxil edilib. Onlardan 16 min 318-i dövlət müəssisələrinə, 8 min 519-u isə özəl müəssisələrə aiddir.
Qeyri-formal məşğulluğun qarşısının alınması məqsədilə cari ilin müvafiq dövrü ərzində 664 sahibkarlıq obyektində monitorinqlər aparılıb. Nəticədə, 498 işçi ilə yeni əmək müqaviləsi bağlanması və 1803 işçinin əmək müqaviləsində əməkhaqqının real göstərilməsi təmin edilib.
Naxçıvan Muxtar Respublikası
Əmək və Əhalinin Sosial Müdafiəsi Nazirliyinin mətbuat xidməti
