Ordubad Rayon Məşğulluq Mərkəzində işaxtaran vətəndaşların məşğulluğunun təmin edilməsi və sosial müdafiəsinin gücləndirilməsinə həssaslıqla yanaşılır. Ötən il ərzində Məşğulluq Mərkəzi tərəfindən 385 işaxtaran qeydiyyata alınıb, 351 nəfər iqtisadiyyatın müxtəlif sahələrində işə qəbul edilib.

Gənclərin və qadınların məşğulluğunun təmin olunması məqsədilə işlər davam etdirilib, nəticədə, ötən dövr ərzində işlə təmin olunanlardan 147-ni gənclər, 124-nü isə qadınlar təşkil ediblər. Onlardan 3 nəfəri sağlamlıq imkanları məhdud şəxsdir.

Rayonda aktiv məşğulluq tədbiri kimi əmək yarmarkalarının hazırlanıb keçirilməsinə də ciddi önəm verilir. Bunun nəticəsidir ki, bəhs olunan dövrdə keçirilən əmək yarmarkalarında, ümumilikdə, 57 nəfər vətəndaş işlə təmin olunub.
Mərkəz sosial müdafiəyə daha çox ehtiyacı olan vətəndaşlara diqqət və qayğını artırmaqla bu kateqoriyadan olan 3 nəfərin kvota yerlərinə göndərilməsini təmin edib.
Ünvanlı sosial yardımın alınması üçün rayon Əhalinin Sosial Müdafiəsi Mərkəzinə müraciət edən vətəndaşlardan 25 nəfəri münasib işlə təmin olunub. Aztəminatlı ailələrin sosial müdafiəsinin yaxşılaşdırılması məqsədilə isə bu müddət ərzində 8 ailəyə simmental və yerli cins inəklər verilib.
Bəhs olunan dövrdə rayonun ümumtəhsil məktəblərində 325 yuxarı sinif şagirdinə peşə­yönümlü məsləhətlər və əmək bazarındakı vəziyyət barədə məlumatlar verilib, rübdə bir dəfə sorğular keçirilib.
2017-ci il ərzində işaxtaran vətəndaşların müvəqqəti məşğulluğunu təmin etmək də diqqətdə saxlanılıb. 34 işaxtaran vətəndaş haqqıödənilən ictimai işlərə, 4 nəfər sağlamlıq imkanları məhdud qadınla isə müqavilə bağlanaraq onlar evlərdə yun şərf və corab toxunuşuna cəlb olunublar. Bu müddət ərzində 177 cüt yun corab və 20 ədəd yun şərf toxunaraq hərbi hissəyə təhvil verilib.

Xəbərlər şöbəsi