Naxçıvan Muxtar Respublikası Ali Məclisi Sədrinin 11 yanvar 2016-cı il tarixli Sərəncamı ilə təsdiq edilən “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabilitasiyası üzrə Dövlət Proqramı”nın müəyyənləşdirdiyi vəzifələr uğurla icra olunur.
Dövlət proqramına uyğun olaraq ötən il ərzində Naxçıvan Muxtar Respublikası Əmək və Əhalinin Sosial Müdafiəsi və Təhsil nazirliklərinin, Ailə, Qadın və Uşaq Problemləri üzrə Dövlət Komitəsinin nümayəndələrindən ibarət komissiya tərəfindən Naxçıvan şəhərinin və muxtar respublikanın bütün rayonlarının təhsil müəssisələrində tədrisə cəlb edilən sağlamlıq imkanları məhdud uşaqlara qarşı tolerant mühitin yaradılması ilə bağlı monitorinqlər aparılıb, valideyn, şagird və müəllimlərlə maarifləndirici görüşlər keçirilib.

Bu istiqamətdə həyata keçirilən tədbirlərin davamı olaraq Babək rayonunun Nehrəm kəndində fəaliyyət göstərən məktəblərdə monitorinq aparılıb və kənd 1 nömrəli tam orta məktəbində maarifləndirici görüş keçirilib. Tədbirdə Nehrəm kənd 1, 2 və 3 nömrəli tam orta məktəblərində, həmçinin Məhdud Fiziki İmkanlılar üçün Naxçıvan Regional İnformasiya Mərkəzində distant tədrisə cəlb olunan sağlamlıq imkanları məhdud uşaqların valideynləri, bu kateqoriyadan olan uşaqlara dərs deyən müəllimlər və məktəb psixoloqları iştirak ediblər. Görüşdə məktəblərdə psixoloji xidmətin təşkilindən, sağlamlıq imkanları məhdud uşaqların təhsilə cəlbindən, onların təhsili ilə bağlı hazırlanan fərdi proqramların icrasından, həmçinin bu kateqoriyadan olan uşaqların reabilitasiyası istiqamətində görülən işlərdən danışılıb.
Komissiya üzvləri tərəfindən tədbir iştirakçılarını maraqlandıran suallar cavablandırılıb.

Naxçıvan Muxtar Respublikası
Əmək və Əhalinin Sosial Müdafiəsi Nazirliyinin mətbuat xidməti