Cari il mart ayının 18-də muxtar respublika Ali Məclisində Naxçıvan Muxtar Respublikasında turizmin inkişaf etdirilməsi ilə bağlı keçirilən müşavirədə muxtar respublika rəhbərinin tapşırıqlarına əsasən, idman federasiyaları üzvlərinin Ağbulaq İstirahət Mərkəzində istirahətləri təşkil edilir.
Avqust ayının 12-13-də mərkəzin növbəti qonaqları Naxçıvan Muxtar Respublikası Atıcılıq Federasiyasının yetirmələri olub. İkigünlük istirahət proqrama uyğun olaraq təşkil edilib.Yeniyetmə atıcıları Ağbulaq İstirahət Mərkəzində mərkəzin və təşkilatçı qurumların əməkdaşları qarşılayıblar. İlk olaraq idmançılar Ağbulaq kəndi ərazisindəki təbiət abidələri ilə tanış olub, “Ağbulaq” bulağına yürüş ediblər. Stolüstü oyunlarda mübarizə aparan yeniyetmə atıcılar arasında mərkəzin stadionunda futbol və voleybol yarışları keçirilib. Şam yeməyindən sonra isə idmançılara vətənpərvərlik mövzusunda sənədli film nümayiş etdirilib.
İkinci günə yeniyetmə idmançılar mərkəzin stadionunda gimnastik hərəkətlərlə başlayıblar. Əyləncəli proqramda isə idmançılar üçün kiçik tamaşalar göstərilib. İdmançılar Batabat yaylağını da gəziblər. Nahar yeməyindən sonra federasiyanın yetirmələrinin Ağbulaq İstirahət Mərkəzində ikigünlük istirahətinə yekun vurulub və onlar Naxçıvan şəhərinə qayıdıblar.
Mərkəzdə olan məşqçilər, idmançılar ikigünlük istirahətdən razı qalıblar. Federasiyanın məşqçisi Fərhad Əliyev, idmançı Hümbət Babayev bizimlə söhbətlərində bildirdilər ki, belə istirahətlər idmançılar üçün əlavə stimul yaradır, onları bu sahəyə daha çox bağlayır. Belə istirahətlər idmançıların yarışlarda uğur qazanmalarına müsbət təsirini göstərir.
Federasiyanın yetirməsi Nail Seyidov dedi ki, idmançıların həmişə istirahətə ehtiyacları olur. Yaradılan bu şəraitə, yeniyetmə idmançılar üçün göstərilən qayğıya görə minnətdarlığımızı bildiririk.
Qeyd edək ki, bu tədbir Naxçıvan Muxtar Respublikası Ali Məclisinin Sədri yanında Gənclər Fondu, Naxçıvan Muxtar Respublikası Gənclər və İdman Nazirliyi, Atıcılıq Federasiyasının birgə təşkilatçılığı ilə keçirilib.
Ceyhun Məmmədov
