Naxçıvan Muxtar Respublikası Gənclər və İdman Nazirliyi, Naxçıvan Muxtar Respublikası Ali Məclisinin Sədri yanında Gənclər Fondu və Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi Ağbulaq İstirahət Mərkəzində “Gənclərin yay məktəbi”ni təşkil ediblər.
Burada gənc fəallar müxtəlif mövzularda diskussiyalarda, intellektual oyunlarda iştirak edib, sosial şəbəkələrdən istifadə qaydaları və bu sahədə fəallığın təmin edilməsi mövzularında keçirilən seminarlarda müzakirələr aparıblar.
Altıgünlük istirahətin ilk günlərində gənclər “Heydər Əliyev və Azərbaycan gəncliyi” adlı seminarda iştirak ediblər, “Ağbulaq” bulağında və Batabat yaylağında, Şahbuz rayonunun ərazisindəki tarixi yerlərdə olublar. Həmçinin gənclər proqrama uyğun olaraq, 27 və 28 iyul tarixlərində “Nuh yurdu” intellektual oyununda iştirak ediblər. 26, 27 və 28 iyulda isə müvafiq olaraq təşkil olunan mini-futbol, şahmat və voleybol yarışlarında gənclərin fəallığı diqqətdən yayınmayıb.
İyulun 26-da düşərgəyə dəvət olunmuş rəssam tərəfindən iştirakçılara rəsm üzrə ustad dərsləri keçilib. İstirahətin sonunda – iyulun 30-da isə Naxçıvan Dövlət Filarmoniyasının konsert proqramı təşkil edilib.
Qeyd edək ki, Ağbulaq İstirahət Mərkəzində təşkil olunan “Gənclərin yay məktəbi”ndə Naxçıvan Dövlət və “Naxçıvan” universitetlərinin, Naxçıvan Müəllimlər İnstitutunun, Naxçıvan Tibb və Naxçıvan Dövlət Texniki kolleclərinin 50-yə yaxın tələbəsi iştirak edib.
“Gənclərin yay məktəbi”ndə iştirak edən “Naxçıvan” Universitetinin tələbəsi Nurtac Seyidova bizimlə söhbətində bildirdi ki, burada istirahət üçün hər bir şərait yaradılıb. Naxçıvan Müəllimlər İnstitutunun tələbəsi Cahangir Məmmədovu isə daha çox cəlb edən rəsm üzrə ustad dərsləridir. Əsgər Quliyev (Naxçıvan Dövlət Universiteti) ilk dəfə Ağbulaq İstirahət Mərkəzində istirahət edib: “Açığı, bu istirahət mərkəzində şəraitin belə olduğunu bilmirdim. Mərkəzdə həm mənalı istirahət etdik, həm də öyrəndik”.
Naxçıvan Tibb Kollecinin tələbəsi Xanım Hüseynli isə Ağbulaq İstirahət Mərkəzində keçirilən “Nuh yurdu” intellektual oyununda fəal iştirak edib. O, burada yaradılan şəraitdən razılıqla danışdı.
Ceyhun Məmmədov
