Hemofiliya bütün dünyada geniş yayılmış irsi qan xəstəliyidir. Azərbaycanda rəsmi statistikaya əsasən, hemofiliyalı xəstələrin sayı 1500-ə yaxındır. Hər il 40-60 yeni xəstə qeydiyyata alınır. Bu xəstəlik insan qanında laxtalanma faktorlarının çatışmazlığı nəticəsində əmələ gələn, anadan, əsasən, oğlan uşaqlarına irsən ötürülən xəstəlikdir.
Hemofiliyalı xəstələr mütəmadi olaraq laxtalanma faktorları qəbul etmədikdə dəfələrlə baş verən şiddətli qanaxmalar, oynaqlara və yumşaq toxumalara qansızmalar onların uşaq və gənc yaşlarında şikəst olmasına, bəzi hallarda isə ölümünə səbəb olur.
Hemofiliyalı Xəstələrin Respublika Assosiasiyası belə xəstələrin vəziyyətinin yaxşılaşdırılması məqsədilə regionlarda maarifləndirici tədbirlər keçirir. Dünən Akademik Zərifə xanım Əliyeva adına Naxçıvan Şəhər Poliklinikası belə bir tədbirə ev sahibliyi etmişdir. Məqsəd hemofiliya xəstəliyinin profilaktikasını təşkil etmək, fəsadlarının qarşısını almaq üçün maarifləndirmə işləri aparmaqdan ibarət idi.
Tədbirdə çıxış edən Hemofiliyalı Xəstələrin Respublika Assosiasiyasının prezidenti Gülnarə Hüseynova bildirmişdir ki, son illər hemofiliyadan əziyyət çəkən insanların müalicəsi istiqamətində mühüm tədbirlər görülmüş, “Hemofiliya və talassemiya irsi qan xəstəlikləri üzrə Dövlət Proqramı”nın həyata keçirilməsi bu xəstələrə göstərilən tibbi yardımın təkmilləşdirilməsinə imkan vermişdir. Görülən tədbirlər nəticəsində hemofiliyalı xəstələrin normal həyat fəaliyyətinin təmin edilməsinə, ömürlərinin uzanmasına, bu xəstəlikdən əlillik və ölüm hallarının azaldılmasına nail olunmuşdur. Amma buna baxmayaraq, hemofiliyalı xəstələrə göstərilən tibbi yardımın daha da təkmilləşdirilməsinə ehtiyac var.
“Hemofiliya daşıyıcısı olan xəstə müalicə aldıqda nə qədər yaşaya bilir?” sualına isə Hemofiliyalı Xəstələrin Respublika Assosiasiyasının regional direktoru Təranə Cəlilova aydınlıq gətirmişdir. Qeyd olunmuşdur ki, hemofiliyalı insan düzgün və vaxtlı-vaxtında müalicə alarsa, sağlam insan nə qədər yaşayarsa, o qədər yaşayar. Çünki təhlükəsiz qandan istehsal olunmuş preparatlarla müalicə xəstələri bütün problemlərdən sığortalayır.
Dövlət proqramında nəzərdə tutulmuşdur ki, xəstələr təhlükəsiz qan faktorları ilə təmin olunacaqlar. Bu, böyük bir məsələdir. Proqram çərçivəsində təhlükəsiz, keyfiyyətli müalicə nəticəsində əlilliyin qarşısı alınacaq və hemofiliyalı insanlar sağlam vətəndaşlardan seçilməyəcəklər. Ümid edirik ki, onlar da sağlam vətəndaşlar kimi təhsil alacaqlar, işləyəcəklər və cəmiyyətdə öz yerlərini tutacaqlar.
Tədbirdə mövzuya dair xronika və sənədli film göstərilmiş, slaydlar nümayiş etdirilmişdir. Tədbir iştirakçılarına “Hemofiliya haqqında nə bilirik?” və “Hemofiliya irsi xəstəlikdir” adlı vərəqə və bukletlər paylanmışdır.
Naxçıvan Muxtar Respublikası
Səhiyyə Nazirliyinin mətbuat xidməti
