Mayın 5-də Məmməd Səid Ordubadi adına Naxçıvan Muxtar Respublika Kitabxanasında görkəmli yazıçı-publisist və pedaqoq Eynəli bəy Sultanovun anadan olmasının 150 illiyinə həsr olunmuş konfrans keçirilib. 

Konfransı Məmməd Səid Ordubadi adına Naxçıvan Muxtar Respublika Kitabxanasının direktoru, tarix üzrə fəlsəfə doktoru Aytəkin Qəhrə­manova açıb.
Konfransda böyük kitabxanaçı Nərmin Allahverdiyeva “Eynəli bəy Sultanovun həyatı və yaradıcılığı”, AMEA Naxçıvan Bölməsinin elmi işçisi Elxan Məmmədov “Eynəli bəy Sultanov və Azərbaycan folkloru”, böyük kitabxanaçı Vəsilə Cəfərova “Eynəli bəy Sultanovun bədii yaradıcılığında şifahi xalq şeiri”, kitabxanaçı Əzizə Süleymanzadə “Eynəli bəy Sultanov və Naxçıvan teatrı” adlı mövzularda çıxış ediblər. Çıxışlarda görkəmli yazıçı-publisist və pedaqoq Eynəli bəy Sultanovun çoxşaxəli fəaliyyətindən söhbət açılıb, onun ədəbiyyatımıza verdiyi töhfələrdən danışılıb.
Qeyd olunub ki, mədəniyyət tariximizə adını həm də teatr xadimi və tənqidçisi kimi həkk etdirən Eynəli bəy Sultanov qabaqcıl ziyalıları öz ətrafında toplayaraq Naxçıvan teatrının yaranmasında yaxından iştirak edib, teatr sənətinin təşəkkülündə mühüm xidmətlər göstərib. Bildirilib ki, əsl ziyalı, humanist və vətənpərvər olan bu şəxs öz xalqının övladlarının dünyagörüşlü, savadlı olmasını istəyib, bu yolda əlindən gələni əsirgəməyib.
Sonda konfrans iştirakçıları Eynəli bəy Sultanovun həyat və fəaliyyətinin əks olunduğu slayda və sərgiyə baxıblar.

Fatma Babayeva