Naxçıvan Dövlət Universitetində Naxçıvan Muxtar Respublikası Yazıçılar Birliyinin üzvləri, eləcə də gənc şairlərlə görüş keçirilib.
Bu münasibətlə təşkil olunan tədbiri giriş sözü ilə açan ali məktəbin rektoru, AMEA-nın müxbir üzvü Saleh Məhərrəmov belə görüşlərin ədəbi mühitin inkişafına, gənclərin bədii ədəbiyyata marağının artırılmasına, yazıçı və şairlərlə oxucuların ünsiyyətinin daha da sıxlaşmasına xidmət etdiyini bildirib.
Naxçıvan Muxtar Respublikası Yazıçılar Birliyinin sədri, Naxçıvan Muxtar Respublikasının Əməkdar mədəniyyət işçisi, şair Asim Əliyev çıxış edərək rəhbərlik etdiyi birliyin yaranma tarixindən və fəaliyyətindən, eləcə də Naxçıvanda yaşayıb-yaradan şairlərin yaradıcılığından söz açıb.
Qeyd olunub ki, hazırda birlik üzvlərinin sayı 80-ə yaxındır. Bu gün Naxçıvanda 30-a yaxın istedadlı gənc şair uğurla fəaliyyət göstərir və birlik daim onlara dəstək olmağa hazırdır.
Sonra Naxçıvanda yaşayıb-yaradan qələm sahibləri Qafar Qəribin, Zaur Vedilinin, Sədaqət Nemətin, Tural Həsənlinin, Qanun Ümmanın, Gülsadə İbrahimlinin, Ruhəngiz Əliyevanın, Elxan Yurdoğlunun, Humay Nurun, Zeynəb Naxçıvanlının vətənpərvərlik mövzusunda qələmə aldıqları şeirləri bədii qiraət olunub. 

Nərmin Cabbarova