Anadan olmasının 147-ci ildönümü münasibətilə qüdrətli dramaturq, yazıçı və publisist Cəlil Məmmədquluzadənin ev-muzeyində tədbir keçirilmişdir.
Tədbiri giriş sözü ilə açan Naxçıvan Muxtar Respublikasının mədəniyyət və turizm naziri Natəvan Qədimova bildirmişdir ki, “Molla Nəsrəddin” məktəbinin banisi, ictimai xadim, böyük vətəndaş Cəlil Məmmədquluzadənin anadan olmasından 147 il ötür. Bu böyük şəxsiyyət Azərbaycanın milli istiqlalı uğrunda mübarizənin ön cərgəsində durmaqla bizim müasirimiz olmuş və bundan sonra da olacaqdır. Cəlil Məmmədquluzadənin əbədiyaşar zəngin irsi dünən, bu gün və gələcək nəsillər üçün müstəqillik, Azərbaycançılıq, millilik və vətəndaşlıq nümunəsidir.
Qeyd olunmuşdur ki, Bakıda 1994-cü il dekabrın 18-də Cəlil Məmmədquluzadənin anadan olmasının 125 illiyi ərəfəsində ev-muzeyi açılmışdır. Azərbaycan xalqının ümummilli lideri Heydər Əliyev muzeyin açılışında iştirak etmiş və nitq söyləmişdir. Ulu öndərin 1998-ci il 19 iyun tarixli digər bir Sərəncamına əsasən, Naxçıvan şəhərində də Cəlil Məmmədquluzadənin ev-muzeyi yaradılmış, 1999-cu il oktyabrın 13-də muzeyin açılışı olmuşdur. Böyük yazıçının vaxtilə müəllimlik etdiyi Nehrəmdə və Cəlilkənddə ədibin xatirə muzeyləri yaradılmış, Naxçıvan Muxtar Respublikası Ədəbiyyat Muzeyinə və Naxçıvan Dövlət Musiqili Dram Teatrına Cəlil Məmmədquluzadənin adı verilmişdir.
Tədbirdə ev-muzeyinin direktoru Aytən Ələkbərova “Cəlil Məmmədquluzadənin həyatı”, Naxçıvan Dövlət Universitetinin Tarix-filologiya fakültəsinin dekanı, filologiya üzrə fəlsəfə doktoru, dosent İman Cəfərli “Cəlil Məmmədquluzadə və dünya ədəbiyyatı” mövzularında çıxış etmişlər.
Görkəmli ədibin tədqiqatçılarından olan AMEA Naxçıvan Bölməsinin əməkdaşı Ramiz Qasımovun da çıxışı olmuşdur.
Sonda Naxçıvan Musiqi Kolleci tələbələrinin hazırladığı “İntelligentlər” əsərindən bir səhnə göstərilmiş və Cəlil Məmmədquluzadənin ev-muzeyinin ekspozisiyasına baxış olmuşdur.
Nərgiz İsmayılova
