Naxçıvan şəhərindəki “Gənclik” Mərkəzində Azərbaycan Respublikası Mədəniyyət və Turizm Nazirliyinin “Salnamə” sənədli filmlər studiyasının istehsalı olan “Sübhdən başlanan həyat” sənədli filminin təqdimatı olub.

Filmin nümayişindən əvvəl Naxçıvan Muxtar Respublikası Mədəniyyət və Turizm Nazirliyinin əməkdaşı Əli Rzayev çıxış edərək bildirib ki, muxtar respublikada sənədli və televiziya filmlərinin nümayişi ənənə halını alıb. Hər il müxtəlif filmlər tamaşaçılara təqdim olunur, sanballı yaradıcılıq və ekran əsərləri ictimaiyyətin diqqətinə çatdırılır. Bu tədbirlərin davamı olaraq Naxçıvan Muxtar Respublikasının 90 illik yubileyi münasibətilə çəkilmiş sənədli film tamaşaçılara təqdim edilir. “Sübhdən başlanan həyat” sənədli filmi Naxçıvana həsr olunan ekran əsərlərindəndir. 33 dəqiqəlik sənədli filmdə Naxçıvanın təbiəti, qədim tarixi və müasir inkişafı, muxtar respublikada həyata keçirilən sosial-iqtisadi islahatlar, insanların həyat tərzi, vətənpərvərlik duyğuları və doğma torpağa bağlılıq hisləri, elmi mühiti, zəngin adət-ənənələri, ucqar dağ və sərhəd kəndlərinin timsalında yaşayış məntəqələrinin inkişafı, insanların fədakarlığı bütün çalarları ilə tamaşaçılara təqdim olunur.

Tədbirdə filmin ssenari müəllifi, Azərbaycan Respublikası Mədəniyyət və Turizm Nazirliyinin sektor müdiri, Azərbaycan Respublikasının Əməkdar mədəniyyət işçisi Yusif Şeyxovun, filmin quruluşçu rejissoru, Azərbaycan Respublikasının Əməkdar incəsənət xadimi Ayaz Salayevin çıxışları olub.
Sonra “Sübhdən başlanan həyat” sənədli filmi tamaşaçılara təqdim edilib.

 Səbuhi Hüseynov