Paytaxt Bakı şəhərindən dəvət olunmuş istedadlı vokal ifaçıları Naxçıvan Dövlət Filarmoniyasında ustad dərsi keçiblər.
Əvvəlcə Naxçıvan Dövlət Filarmoniyasının direktoru, Azərbaycan Respublikasının Əməkdar artisti Elman Əliyev çıxış edərək bildirib ki, artıq bir neçə aydır, muxtar respublikada müxtəlif sahələr üzrə ustad dərsləri keçilir. Bu dərslər gənclərin təhsil aldıqları sahələr üzrə gələcəkdə peşəkar kadr kimi yetişməsinə böyük töhfə olacaq. Elman Əliyev ustad dərsində iştirak edən tanınmış sənət adamları haqqında tədbir iştirakçılarına məlumat verib.
Xalq artisti Samir Cəfərov, Azərbaycan Respublikasının Əməkdar artistləri İlqar Muradov və Cahangir Qurbanov, “Muğam Müsabiqəsi-2013” Televiziya Müsabiqəsinin qalibi Sərxan Bünyadzadə çıxış edərək Naxçıvan torpağının yetirmələri olduqlarını bildiriblər, burada mədəniyyətə, incəsənətə göstərilən qayğıdan danışıblar.

Ustad dərsində muxtar respublikamızda fəaliyyət göstərən uşaq musiqi, incəsənət və bədii sənətkarlıq məktəblərinin şagirdləri, Naxçıvan Dövlət Universitetinin və Naxçıvan Musiqi Kollecinin tələbələri, Naxçıvan Dövlət Filarmoniyasının solistləri iştirak ediblər.
Tanınmış vokalçılar səs diapazonuna uyğun repertuar seçimi, düzgün tələffüz və vurğu, ifa zamanı tənəffüs orqanlarının fəaliyyətinin düzgün tənzimlənməsi, səhnə mədəniyyəti, jestikulyasiyalardan yerində istifadə ilə bağlı tövsiyələr veriblər.

Xəbərlər şöbəsi