Naxçıvan Muxtar Respublikası Mədəniyyət və Turizm Nazirliyinin təşkilatçılığı ilə Naxçıvan Dövlət Universitetində Azərbaycan Respublikasının Əməkdar artisti, Prezident təqaüdçüsü Xəlil Hüseynovla görüş keçirilib. Görüşdə ali təhsil ocağının İncəsənət fakültəsində təhsil alan tələbələr iştirak ediblər.
Universitetin İncəsənət fakültəsinin dekanı, Azərbaycan Respublikasının Əməkdar artisti Mübariz Əsgərov Cəlil Məmmədquluzadə adına Naxçıvan Dövlət Musiqili Dram Teatrının səhnəsində 40 ildən artıq zəngin sənət yolu keçən, böyük tamaşaçı sevgisi qazanan Azərbaycan Respublikasının Əməkdar artisti Xəlil Hüseynovun İncəsənət fakültəsində, xüsusilə də Aktyorluq sənəti ixtisasında təhsil alan tələbələrlə görüşünü yüksək dəyərləndirib. Natiq aktyor olmaq üçün ilk addımlarını atan gənclərin tanınmış incəsənət adamları ilə görüşünün onların gələcək səhnə həyatına böyük fayda verəcəyini vurğulayıb.
Görüşdə çıxış edən Cəlil Məmmədquluzadə adına Naxçıvan Dövlət Musiqili Dram Teatrının direktoru, Azərbaycan Respublikasının Xalq artisti Rza Xudiyev Xəlil Hüseynovun həyatı və yaradıcılığı haqqında geniş məlumat verib. Vurğulanıb ki, Naxçıvan teatr sənətinə dəyərli töhfələr vermiş Xəlil Hüseynovun əməyi dövlətimiz tərəfindən yüksək qiymətləndirilib. Aktyor 2000-ci ildə “Naxçıvan Muxtar Respublikasının Əməkdar artisti”, 2006-cı ildə “Azərbaycan Respublikasının Əməkdar artisti” fəxri adlarına layiq görülüb. Xəlil Hüseynov 2005-ci ildə Prezident mükafatçısı olub, 2008-ci ildən isə Prezident təqaüdçüsüdür.
Naxçıvan Muxtar Respublikası Mədəniyyət və Turizm Nazirliyinin əməkdaşı, Azərbaycan Respublikasının Xalq artisti Kamran Quliyev Xəlil Hüseynovun səhnədə yaratdığı obrazlar haqqında danışıb. O bildirib ki, istedadlı aktyor Nazim Hikmətin “Qəribə adam” pyesində İsmayıl, Cəfər Cabbarlının “Aydın” əsərində Balaxan, Anarın “Sizi deyib gəlmişəm” pyesində Məmmədhəsən, Nəriman Həsənzadənin “Atabəylər” pyesində Memar Əcəmi, İslam Səfərlinin “Göz həkimi” pyesində Şahbazov və başqa çoxsaylı obrazlar yaradıb.
Azərbaycan Respublikasının Əməkdar artisti, Prezident təqaüdçüsü Xəlil Hüseynov yeni aktyor məktəbinin inkişaf etdirilməsi və peşəkarlıq səviyyəsinin artırılması üçün gənc aktyorlara tövsiyələr verib, teatr sənətimizin inkişafı üçün bundan sonra da əlindən gələni əsirgəməyəcəyini bildirib.
Mina QASIMOVA
