Naxçıvan Muxtar Respublikası Yazıçılar Birliyində Azərbaycan Yazıçılar Birliyinin üzvü Zaur Vedilinin yenicə çapdan çıxmış “Dahi insan” kitabının “imza günü” keçirilib.
“İmza günü”ndə şairin qələm yoldaşları, ədəbi tənqidçilər, ictimaiyyətin nümayəndələri və oxucular iştirak ediblər.
Tədbirdə çıxış edən Naxçıvan Muxtar Respublikası Yazıçılar Birliyinin sədri Asim Yadigar Naxçıvanda müxtəlif şair və yazıçıların çapdan çıxan kitablarının “imza günləri”nin keçirilməsi ənənəsinin formalaşmasının əhəmiyyətindən danışıb. O qeyd edib ki, yeni kitabda yer alan “Dahi insan” poeması Zaur Vedilinin müəllifi olduğu çoxsaylı ədəbi nümunələr içərisində özünəməxsus yer tutur.
“İmza günü”ndə şairin qələm yoldaşlarından İbrahim Yusifoğlu,Firudin Süleymanoğlu, Vəli Qaraxan, birliyin gənclər təşkilatının sədri Elnur Kəlbizadə çıxış edərək yeni kitab barədə fikirlərini bildirib və şairə yaradıcılığında uğurlar arzulayıblar.
Sonda çıxış edən müəllif tədbirdə iştirak edən qələm dostlarına təşəkkürünü bildirib.
Qeyd edək ki, Naxçıvan Muxtar Respublikasında 2013-cü ilin “Heydər Əliyev ili” elan edilməsi ilə əlaqədar oxuculara şair töhfəsi olan bu kitabda Zaur Vedilinin “Dahi insan” poeması yer alıb. Azərbaycan və Avroasiya Yazıçılar birliklərinin üzvü, tarix üzrə fəlsəfə doktoru Vaqif Məmməd­ovun redaktoru olduğu kitab “Elm və təhsil” nəşriyyatında işıq üzü görüb.

Xəbərlər şöbəsi