Tədbiri giriş sözü ilə kollecin müəllimi Rəna Vəliyeva açıb. Naxçıvan Muxtar Respublikası Yazıçılar Birliyinin sədri Asim Yadigar, kollecin müəllimi Xanım Kazımova, yazıçı Sona Teymurbəyli, şair Nazlı Hacılı, Elnur Kəlbizadə və başqaları çıxışlarında Azərbaycan qadınına xas olan müsbət keyfiyyətlərdən danışıblar. Qeyd olunub ki, ictimai-siyasi və sosial-mədəni həyatda qadınların fəaliyyətlərinin genişləndirilməsi böyük əhəmiyyət kəsb edir. Naxçıvan qadınları doğma Naxçıvanımızın çiçəklənməsində, inkişafında, qüdrətli bir regiona çevrilməsində əllərindən gələni əsirgəmirlər. Bildirilib ki, bu sözlər Naxçıvanın yazar qadınlarının fəaliyyətində özünü qabarıq şəkildə göstərir. Onlar öz yaradıcılıqları ilə milli mədəniyyət tariximizin səhifələrinə yeni töhfələr bəxş edirlər.
Tədbirdə Sona Teymurbəylinin yeni çapdan çıxmış “Naxçıvan Muxtar Respublikasında yaşayıb-yaradan qadınlarımız” adlı kitabı haqqında da fikirlər söylənilib. Vurğulanıb ki, kitabda keçmişlə bu günə körpü salınaraq Naxçıvanda yazıb-yaradan qadınlarımızın Vətənə məhəbbəti, torpağa bağlılığı, sevgi dünyası və sair mövzulara aid əsərləri portret, məqalə-oçerk şəklində çap edilib.
Sonra çıxış edənlərin hər biri öz şeirləri ilə qadınları qarşıdan gələn 8 Mart – Beynəlxalq Qadınlar Günü münasibətilə təbrik ediblər.
Tədbirə Naxçıvan Muxtar Respublikası Yazıçılar Birliyinin sədri Asim Yadigar yekun vurub.

Xəbərlər şöbəsi