Mayın 6-da Naxçıvan şəhərindəki “Gənclik” Mərkəzində Azərbaycan xalqının ümummilli lideri Heydər Əliyevin anadan olmasının 92-ci ildönümünə həsr olunmuş muxtar respublikanın uşaq musiqi, incəsənət və bədii sənətkarlıq məktəbləri şagirdlərinin yekun konserti olub.
Tədbir iştirakçıları əvvəlcə ulu öndər Heydər Əliyevin Naxçıvan şəhərindəki büstünü ziyarət edərək önünə gül dəstələri düzüblər.
Konsert proqramından əvvəl Naxçıvan Muxtar Respublikasının Mədəniyyət və Turizm naziri Sarvan İbrahimov çıxış edərək dahi rəhbər Heydər Əliyevin mədəniyyətimizin və incəsənətimizin inkişafı və tanıdılmasında misilsiz xidmətlərindən danışıb. Vurğulanıb ki, çoxəsrlik zəngin tarixi olan Azərbaycan mədəniyyətinin bugünkü səviyyəyə yüksəlməsində dahi rəhbər Heydər Əliyevin böyük rolu vardır. Bu gün ölkəmizdə və muxtar respublikamızda ümummilli liderimizin mədəniyyət və incəsənət sahəsində müəyyənləşdirdiyi inkişaf yolu uğurla davam etdirilir; yeni mədəniyyət müəssisələri, konsert salonları, musiqi məktəbləri, muzeylər, kitabxanalar, teatr binaları istifadəyə verilir.
Bugünkü yekun konsertdə rayonlar üzrə fərqlənmiş uşaq musiqi, incəsənət və bədii sənətkarlıq məktəbləri şagirdlərinin iştirak etdiyini deyən nazir rayonlar üzrə keçirilmiş konsertlərdə fərqlənən şagirdlərə Naxçıvan Muxtar Respublikası Mədəniyyət və Turizm Nazirliyinin fəxri fərmanlarını təqdim etdi.
Konsertdə Babək Rayon Uşaq musiqi məktəbinin xalq çalğı alətləri orkestri, Bəhruz Kəngərli adına Şərur Şəhər Uşaq incəsənət məktəbinin, Naxçıvan şəhərində, Culfa, Kəngərli, Ordubad və Şahbuz rayonlarında fəaliyyət göstərən uşaq musiqi, incəsənət və bədii sənətkarlıq məktəbləri şagirdlərinin və musiqi ansambllarının ifalarında Avropa, rus bəstəkarlarının və görkəmli bəstəkarlarımızdan Üzeyir Hacıbəylinin, Müslüm Maqomayevin, Fikrət Əmirovun, Qənbər Hüseynlinin, Tofiq Quliyevin, Səid Rüstəmovun musiqi əsərləri səsləndirilib. Şagirdlərin ifalarında muğam və xalq mahnıları alqışlarla qarşılanıb.
Xəbərlər şöbəsi
