Azərbaycan xalqının ümummilli lideri Heydər Əliyevin anadan olmasının 92-ci ildönümü ilə əlaqədar mayın 5-də Şərur Rayon Uşaq incəsənət və musiqi məktəblərinin kollektivi Şərur şəhərindəki “Bahar” kinoteatrında, Ordubad rayonunun Vənənd Kənd Uşaq musiqi məktəbinin kollektivi Düylün Kənd Mərkəzində, Babək rayonunun Şıxmahmud Kənd Uşaq musiqi məktəbinin kollektivi Şıxmahmud kənd mədəniyyət evində, Culfa rayonunun Bənəniyar Kənd Uşaq musiqi məktəbinin kollektivi Əbrəqunus kənd mədəniyyət evində, Kəngərli rayonunun Uşaq musiqi məktəblərinin kollektivləri Kəngərli Rayon Mədəniyyət Evində, Şahbuz Rayon Uşaq musiqi məktəbinin kollektivi Şahbuz şəhərindəki “Araz” kinoteatrında, Kolanı Kənd Uşaq musiqi məktəbinin kollektivi isə Aşağı Qışlaq Kənd Mərkəzində konsert proqramı ilə çıxış ediblər.
Konsert proqramları başlamazdan əvvəl çıxış edənlər bildiriblər ki, görkəmli dövlət xadimi Heydər Əliyevin milli mədəniyyətə qoruyucu, yaradıcı münasibətinin, bu sahəyə tükənməz qayğı və diqqətinin əsas mənbəyi Vətən sevgisi, hüdudsuz xalq məhəbbəti idi. Aparılan müdrik siyasət nəticəsində milli mədəniyyətimiz beynəlxalq miqyasda tanındı, dünyanın diqqət mərkəzinə çıxarıldı. Xalqımızın zaman-zaman yaratdığı milli mədəniyyətin qorunub saxlanılması, zənginləşdirilməsi, gələcək nəsillərə çatdırılması sahəsində həyata keçirilən tədbirlər bütün nəsillərin ehtiram və minnətdarlıqla qarşıladığı tarixi xidmətdir.
Qeyd olunub ki, belə tədbirlər içərisində musiqi mədəniyyətinin inkişafı da diqqət mərkəzində saxlanılıb. Zəngin xalq musiqisinin tədqiqi, Azərbaycan bəstəkarlarının hərtərəfli fəaliyyətinin təmin və təbliğ olunması, yerlərdə musiqi məktəbləri şəbəkəsinin genişləndirilməsi ulu öndərin müəyyənləşdirdiyi siyasət kimi bu gün də uğurla davam etdirilir.
Vurğulanıb ki, Naxçıvan Muxtar Respublikasında da musiqi mədəniyyətinin inkişafına ciddi önəm verilir. İstedadlı musiqiçilərin yetişdirilməsi, onların kütləvi-mədəni tədbirlərdə iştirakı təmin olunur. Hər il muxtar respublikada müsabiqələr keçirilir, qalib musiqiçilər mükafatlandırılır.
Konsert proqramlarında gənc musiqiçilərin ifasında səslənən Azərbaycan xalq musiqisi və bəstəkar mahnıları, həmçinin xarici ölkə bəstəkarlarının əsərləri tədbir iştirakçılarında xoş ovqat yaradıb.
Xəbərlər şöbəsi
