Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyinin, Naxçıvan Muxtar Respublikası Ali Məclisinin Sədri Yanında Gənclər Fondunun və Naxçıvan Muxtar Respublikası Gənclər və İdman Nazirliyinin təşkilatçılığı ilə Naxçıvan Musiqi Kollecinin bir qrup tələbəsi dünən Naxçıvan Muxtar Respublika Ədəbiyyat Muzeyində olub.
Məlumat verilib ki, muzeyin ekspozisiyasında nümayiş etdirilən müxtəlif qiymətli əlyazmalar, tətbiqi və təsviri sənət nümunələri, kitab, qəzet və jurnallar, ədəbi mühitin tanınmış nümayəndələrinə aid xatirə əşyaları nümayiş etdirilir. Burada yaradılmış zəngin guşələr vasitəsilə tamaşaçılar Azərbaycan ədəbiyyatının klassik və müasir nümayəndələrinin, eləcə də Naxçıvan ədəbi mühitinin tanınmış simalarının həyat və yaradıcılıqları ilə tanış ola və onlar haqqında dolğun məlumatlar ala bilərlər. Buna görə də muzey görkəmli ədəbi simaların həyat və yaradıcılıqlarının öyrənilməsində, eyni zamanda onların əsərlərinin elmi cəhətdən araşdırılmasında mühüm rol oynayır.

Ceyhun Məmmədov