Dünən Naxçıvan şəhərindəki “Gənclik” Mərkəzində Naxçıvan Muxtar Respublikası Gənclər və İdman Nazirliyi və Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin təşkilatçılığı ilə erməni vəhşiliklərindən bəhs edən “Xoca” filmi nümayiş etdirilmişdir. Gənc nəslə vətənpərvərlik hisslərinin aşılanması məqsədilə təşkil edilmiş tədbirdə muxtar respublikanın ali və orta ixtisas təhsili müəssisələrindən, ümumilikdə, 400 nəfərdən çox gənc iştirak etmişdir.
Faktlar əsasında çəkilmiş “Xoca” filmində soyqırımının necə planlaşdırıldığı və bu hadisələrin başvermə səbəblərinin pərdəarxası məqamları ön plana çəkilmişdir. Bakıda və Xocalıda paralel şəkildə baş verən hadisələri özündə əks etdirən və 102 dəqiqə tamaşaçını gərginlik və həyəcan içində saxlayan film tamaşaçılar tərəfindən maraqla izlənmişdir.

Naxçıvan Muxtar Respublikası
Gənclər və İdman Nazirliyinin mətbuat xidməti