Dünən Şahbuz rayonundakı Şahbuzkənddə rayon Uşaq musiqi məktəbinin kollektivi konsert proqramı ilə çıxış edib.
Konsert proqramında musiqi məktəbinin xor kollektivi ilə yanaşı, solo ifaçılar və saz ansamblının üzvləri tərəfindən müxtəlif əsərlər, mahnılar və musiqilər ifa olunub. Konsertdə Azərbaycan xalq mahnı və musiqiləri, muğam və təsnifləri, bəstəkar mahnıları səsləndirilib, fortepianoda dünya klassiklərinin əsərləri ifa edilib. Məktəbin şagirdlərindən Şəbnəm Məmmədova, Aygün Aydınlı və başqaları ifa etdikləri musiqi nömrələrini həvəslə dinləyicilərə çatdırıblar. Bununla yanaşı, tarda, kamançada, sazda solo ifalar edən Elmin Əliyev, Nihad Seyidov, Aişə Əsədli və başqaları öz musiqi istedadlarını ifaları ilə göstəriblər. Saz ansamblının üzvləri də bir neçə aşıq havası ifa etməklə xalqımıza məxsus bu milli musiqinin ecazkarlığını bir daha izhar ediblər. Şahbuzkənd ziyalılarının, ictimaiyyət nümayəndələrinin qarşısında çıxış edən rayonun Uşaq musiqi məktəbi kollektivinin üzvləri tədbir boyu tamaşaçıları heyrətləndiriblər. Çünki səlis, məharətlə və ürəkdən ifa olunan hər bir mahnı, musiqi sanki ilk dəfə ifa olunurmuş kimi dinləyicilərdə xoş ovqat yaradıb.
Qeyd edək ki, konsert kənd mərkəzində keçirilib. Müasir üslubda tikilmiş bu sosial obyektdə belə tədbirlərin keçirilməsi adi hal alıb. Əvvəllər hər hansı bir tədbirin keçirilməsi üçün belə nümunəvi məkanın olmaması kənd sakinlərini də narazı salırdı. Lakin bu gün tez-tez eşitdiyimiz kəndlə şəhər arasındakı fərq aradan qaldırılıb ifadəsi belə tədbirlər zamanı bir daha öz təsdiqini tapır. Şahbuzkənddə Novruz bayramı ərəfəsində gənc istedadların birləşdiyi rayon Uşaq musiqi məktəbinin şagirdləri tərəfindən belə bir konsert proqramının təqdim olunması özü də onu göstərir ki, tikinti, yenidənqurma işləri regionlarda hər bir sahənin inkişafına, o cümlədən insanların asudə vaxtlarının belə mədəni-kütləvi tədbirlərdə keçməsinə imkan verir.
Məlumat üçün bildirək ki, bundan əvvəl Kəngərli rayonunun Qıvraq Qəsəbə, Çalxanqala Kənd və Şahbuz rayonunun Kolanı Kənd Uşaq musiqi məktəblərinin musiqi kollektivləri həmin yaşayış məntəqələrində konsert proqramları ilə çıxışlar ediblər.
Şəhla Nəbiyeva
