Bir neçə gündən sonra 2015-ci il yurdumuza qədəm qoyacaq. Bu münasibətlə mədəniyyət müəssisələrində Yeni il bayramı ilə əlaqədar müxtəlif tədbirlər hazırlanıb.
M.T.Sidqi adına Naxçıvan Dövlət Kukla Teatrı dekabrın 29-dan teatrın binasında yeni il şənlikləri keçirəcəkdir. Teatr şənlikləri yeni ilin 1, 2, 3, 4 yanvarında da davam etdirəcəkdir. Yeni il şənliklərində kukla teatrının hazırladığı “Tovuz quşunun nəğmələri” və “Nəğməkar Bülbül” tamaşalarından da parçalar göstəriləcəkdir. Şənliklərdə şən nəğmələr səsləndiriləcək, Şaxta baba, Qar qız və kloun da (məzhəkəçi) uşaqların görüşünə gələcək. Tamaşalar gün ərzində saat 11⁰⁰, 13⁰⁰ və 15⁰⁰-də başlanacaq.
Naxçıvan Dövlət Uşaq Teatrında da maraqlı yeni il şənlikləri keçiriləcəkdir. Balacalar və uşaqlar bu teatrda əvvəlcə Naxçıvan Muxtar Respublikasının Əməkdar artisti Vüsal Rza­yevin müəllifi olduğu, həm də onun quruluş və musiqi tərtibatı ilə hazırlanmış “Baş tutmayan kələk” tamaşa-kompozisiyasına baxa biləcəklər. Bu tamaşa-kompozisiyada uşaqlar yeni il şənliyinə tələsən Şaxta babanın başına gələn qəribə sərgüzəştlərin şahidi olacaqlar. Bundan sonra uşaqlar üçün şən yeni il mahnıları səsləndiriləcək. Dekabrın 30-dan yanvarın 4-nə kimi keçiriləcək şənliklərin başlama saatı 10⁰⁰, 12⁰0, 14⁰⁰ və 16⁰⁰-dır.

Yeni il şənlikləri Naxçıvan Dövlət Filarmoniyasında da keçiriləcəkdir. Balacalar burada da Şaxta baba və Qar qızla görüşəcəklər. Filarmo­niyada şənliklərin gündüz saat 11⁰0-də başlanması nəzərdə tutulur.
Naxçıvan Dövlət Film Fondunda isə məktəblilərin qış tətili günlərində onlar üçün Azərbaycan filmləri nümayiş etdiriləcəkdir. Filmlər yanvarın 2-dən başlayaraq saat 11⁰⁰-də göstəriləcəkdir.
Balacalar və məktəbliləri yeni il şənliklərində iştirak etməyə dəvət edirik.

Naxçıvan Muxtar Respublikası
Mədəniyyət və Turizm Nazirliyinin mətbuat xidməti