Dekabrın 25-də Babək Rayon Mədəniyyət Evində Naxçıvan Muxtar Respublikasının yaradılmasının 90 illik yubileyi münasibətilə müxtəlif nominasiyalar üzrə keçirilən müsabiqələrin qaliblərinin mükafatlandırılması mərasimi olub. Mərasimdə Babək Rayon İcra Hakimiyyəti başçısının müavini Nailə Vəliyeva çıxış edərək bildirib ki, muxtariyyət statusu qazandıqdan sonra muxtar respublikanın tarixində köklü dəyişikliklər baş verib. 90 illik muxtariyyət dövrünün son 19 ili isə Naxçıvanın muxtariyyət tarixinin intibah dövrüdür. Blokadanın çətinliklərinə baxmayaraq, 1995-2014-cü illərdə muxtar respublikada böyük quruculuq proqramı gerçəkləşdirilib, bütün sahələrdə mühüm nailiyyətlər əldə olunub.
Babək Rayon Təhsil Şöbəsinin müdiri Kamil Kazımov çıxış edərək bildirib ki, Naxçıvan Muxtar Respublikasının 90 illik yubileyinin keçirilməsi ilə əlaqədar Babək Rayon İcra Hakimiyyətinin tədbirlər planına əsasən, rayonun idarə və təşkilatlarında geniş tədbirlər keçirilib. Rayonumuzun ümumtəhsil məktəblərində yanvar ayından başlayaraq qrafik əsasında elmi-praktik konfranslar, şahmat, dama, bilik yarışları, inşa-yazı və şeir müsabiqələri təşkil olunub.
Müsabiqələr 4 zona üzrə təşkil edilib. Zona yarışlarının qalibləri final mərhələsində iştirak etmək hüququ qazanıblar. Bugünkü tədbir də final mərhələsində qalib olan şagirdlərin İcra Hakimiyyəti tərəfindən mükafatlandırılmasına həsr olunub.
Babək Rayon Mədəniyyət və Turizm Şöbəsinin müdiri əvəzi Niyaz İsmayılov muxtar respublikada mədəniyyət sahəsinə göstərilən diqqət və qayğıdan danışıb. Qeyd olunub ki, muxtar respublikada 1995-2014-cü illərdə bütün sahələr kimi, mədəniyyət sahəsi də əsl intibaha qovuşub. Naxçıvan Muxtar Respublikasında 350-dən çox mədəniyyət obyektinin tikilib istifadəyə verilməsi və ya bərpa edilməsi regionda mədəniyyətin inkişafına real təminat yaradıb.
Daha sonra qaliblər Babək Rayon İcra Hakimiyyəti tərəfindən mükafatlandırılıb, Babək rayonunun uşaq musiqi məktəblərinin konsert proqramı olub.
Xəbərlər şöbəsi
