Xəbər verdiyimiz kimi, dekabrın 5-də Culfa Rayon Mədəniyyət Evində “İstedadlar sorağında” adlı bədii özfəaliyyət kollektivlərinin baxış-müsabiqəsinə start verilib.
Naxçıvan Muxtar Respublikasının 90 illik yubileyinə həsr olunmuş müsabiqənin I turu 5-9 dekabr tarixlərində zonalar üzrə başa çatdıqdan sonra dekabrın 17-də Naxçıvan Dövlət Filarmoniyasında baxış-müsabiqənin II turu olub. İkinci turda I turda fərqlənmiş özfəaliyyət kollektivləri və tək ifaçılar öz istedadlarını nümayiş etdiriblər. Yaş məhdudiyyəti olmayan müsabiqədə ifa tərzi və səhnə mədəniyyəti ilə seçilən özfəaliyyət kollektivləri və tək ifaçıların çıxışları maraqla qarşılanıb.
Baxış-müsabiqənin diqqəti cəlb edən cəhətlərindən biri bədii özfəaliyyət kollektivlərinin və tək ifaçıların çıxışlarının rəngarəng olması idi. Müsabiqədə instrumental ifaçılıq, mahnı və muğam ifaçılığı üzrə çıxışlar başa çatdıqdan sonra səhnə folklor kollektivlərinə verildi.
Kəngərli, Şərur, Şahbuz rayonlarının folklor kollektivlərinin ifaları alqışlarla qarşılandı.
Baxış-müsabiqədə Azərbaycan milli musiqi alətləri – zurna, balaban, nağarada ifa olunan musiqi nömrələri maraqla qarşılandı. Babək rayonundan olan Firdovsi Səfərovun nəlbəkilərdə ifası hamının marağına səbəb oldu.
Baxış-müsabiqədə Səriyyə Rəhimlinin, Gülnar Qasımovanın, Aysu Məmmədovanın, Vüsalə İsmayılovanın rəqs ifaları muxtar respublikada qədim rəqs sənətinin yaşadılmasına olan marağın ifadəsi idi. Zeynəb Aslanlı isə baxış-müsabiqəyə bədii qiraətlə qatılmışdı.
Tədbirdə fasilə zamanı münsiflər heyəti əl işləri ilə tanış oldular. Culfa, Ordubad, Babək, Kəngərli rayonlarından gətirilmiş müxtəlif əl işləri – mis üzərində döymə, toxuma, maket və sair diqqətəlayiq idi. Culfa rayonundan daha çox iştirakçının əl işləri ilə burada təmsil olunması da nəzərdən qaçmadı.
Baxış-müsabiqənin sonunda münsiflər heyəti II turda fərqlənənləri elan etdi.
Qeyd edək ki, bu gün Naxçıvan Dövlət Filarmoniyasında baxış-müsabiqədə fərqlənənlərin yekun tədbiri olacaq. Əl işləri, instrumental ifaçılıq, mahnı ifaçılığı, rəqs nominasiyaları üzrə fərqlənən müsabiqə iştirakçıları yekun tədbirdə Naxçıvan Muxtar Respublikası Mədəniyyət və Turizm Nazirliyinin diplom və fəxri fərmanları ilə təltif olunacaqlar.
Əli RZAYEV
