C.Məmmədquluzadə adına Naxçıvan Muxtar Respublika Ədəbiyyat Muzeyində İslam Səfərlinin anadan olmasının 90 illiyinə həsr edilmiş tədbir keçirilib. “Poeziyamızın nəğməkar şairi” mövzusunda keçirilən tədbiri giriş sözü ilə açan Ədəbiyyat Muzeyinin direktoru Aləmzər İbrahimova İslam Səfərlinin həyat və yaradıcılığından danışıb.
Naxçıvan Muxtar Respublikası Yazıçılar Birliyinin sədri, şair Asim Yadigar “İslam Səfərli yaradıcılığında Naxçıvan”, Azərbaycan Teatr Xadimləri və Rəssamlar ittifaqlarının üzvü Əli Səfərli “İslam Səfərli haqqında xatirələr” mövzularında çıxış ediblər.
Qeyd olunub ki, İslam Səfərli 12 fevral 1923-cü ildə Babək rayonunun Şəkərabad kəndində dünyaya göz açıb. Naxçıvan şəhərindəki 1 nömrəli məktəbi bitirdikdən sonra könüllü olaraq 1941-1945-ci illər müharibəsində iştirak edib. Müharibə mövzusundakı şeir və poemalarında həmvətənlərimizin alman faşizminə qarşı mübarizədə göstərdiyi şücaəti təsirli poetik lövhələrlə təsvir edib. İslam Səfərli dramaturq kimi də böyük uğurlar qazanıb. “Göz həkimi”, “Ana ürəyi”, “Yol ayrıcında”, “Xeyir və şər”, “Dədəgünəş əfsanəsi” və sair əsərləri müxtəlif vaxtlarda tamaşaya qoyulub, tamaşaçı rəğbəti qazanıb. Oçerk, novella, libretto və kinossenari müəllifi kimi də tanınan İslam Səfərli məşhur sənətkarların əsərlərindən uğurlu tərcümələr edib, onun şeirlərinə bəstələnmiş mahnılar dillər əzbəri olub.
Tədbirdə Naxçıvan Dövlət Universitetinin tələbələri və Naxçıvan şəhərindəki 8 nömrəli tam orta məktəbin şagirdləri İslam Səfərlinin şeirlərini səsləndiriblər.
Sonra tədbir iştirakçıları muzeydə yaradılmış “İslam Səfərli – 90” adlı sərgiyə baxıblar.
Elnur KƏLBİZADƏ
