Naxçıvan Dövlət Universitetində Prezident təqaüdçüsü, Fizika və energetika kafedrasının dosenti, fizika-riyaziyyat üzrə fəlsəfə doktoru Faiq Mirişlinin anadan olmasının 75 illiyinə həsr edilmiş tədbir keçirilib.
Yubiley tədbirini Naxçıvan Dövlət Universitetinin rektoru, professor Saleh Məhərrəmov açaraq bildirib ki, universitetdə fəaliyyət göstərdiyi illər ərzində F.Mirişli Elektroradiotexnika və materialşünaslıq kafedrasının müdiri, 1992-1997-ci illərdə universitetin tədris işləri üzrə prorektoru, 1997-2007-ci illərdə Fizika kafedrasının müdiri vəzifələrində çalışıb.
Universitetin elmi işlər üzrə prorektoru, fizika üzrə fəlsəfə doktoru, dosent Mübariz Nuriyev çıxış edərək Prezident təqaüdçüsü Faiq Mirişlinin həyat yolu və elmi-pedaqoji fəaliyyəti haqqında məlumat verib. Bildirilib ki, F.Mirişli səriştəli tədqiqatçı alimdir. Onun bərk cismlər fizikasının seqnetoelektriklər sahəsində apardığı elmi-tədqiqat işlərinin nəticələri xarici elmi mətbuatda çap edilib. O, spontanpolyarizələşmiş kristalların əmələgəlmə kriteriyasını verib, ilk dəfə 20-dən çox təbəqəli quruluşa malik seqnetomaqnit kristallarının quruluşunu öyrənib və həmin kristalların kompleks tədqiqatını aparıb.
Memarlıq və mühəndislik fakültəsinin dekanı, texnika üzrə fəlsəfə doktoru, dosent Cavanşir Zeynalov, Fizika və energetika kafedrasının müdiri, fizika-riyaziyyat üzrə fəlsəfə doktoru, dosent Şəmsəddin Kazımov, Fizika-riyaziyyat fakültəsinin dekanı, riyaziyyat üzrə fəlsəfə doktoru, dosent Tofiq Nəcəfov, universitetin beynəlxalq əlaqələr üzrə prorektoru, riyaziyyat üzrə fəlsəfə doktoru Anar Kazımov çıxış edərək Faiq Mirişlinin universitetdə hamı ilə səmimi münasibətindən, müəllim adını şərəflə daşıyaraq tələbələrə fizika fənninin sirlərinin öyrədilməsində onun pedaqoji bacarığından bəhs edib, yubilyara öz təbriklərini çatdırıblar.
Sonra söz yubilyara verilib. Hazırda Energetika və fizika kafedrasının dosenti vəzifəsində fəaliyyətini davam etdirən yubilyar Faiq Mirişli xoş sözlərə və göstərilən qayğıya görə minnətdarlığını bildirib.
Sonda yubilyar çoxillik elmi-pedaqoji fəaliyyətinə görə universitetin fəxri fərmanı ilə təltif olunub.
Mehriban SULTAN
