Sağlamlıq imkanları məhdud şəxslərin VIII Ümumrespublika Bədii yaradıcılıq baxış-müsabiqəsində iştirak edən muxtar respublika təmsilçisi Sənan Salmanov uğurla çıxış edərək müsabiqədə II yerə layiq görülüb.
Qeyd edək ki, Sənan Salmanov muxtar respublikada fəaliyyət göstərən sağlamlıq imkanları məhdud şəxslərdən ibarət “İnam” musiqi qrupunun üzvüdür. O, noyabrın 7-də Naxçıvan Muxtar Respublikası Əmək və Əhalinin Sosial Müdafiəsi Nazirliyinin və Mədəniyyət Nazirliyinin birgə təşkilatçılığı ilə keçirilən muxtar respublikada yaşayan məhdud fiziki imkanlı şəxslər və sağlamlıq imkanları məhdud uşaqlar arasında solo oxuma (xanəndəlik və vokal), rəqs, instrumental ifaçılıq və bədii qiraət növləri üzrə bədii yaradıcılıq müsabiqəsinin ən yaxşısı olub. Bu müsabiqənin qalibi kimi VIII Ümumrespublika Bədii yaradıcılıq baxış-müsabiqəsində iştirak edib.
