Naxçıvan Muxtar Respublikası Mədəniyyət Nazirliyi tərəfindən fevral ayında mədəni-kütləvi, əlamətdar və tarixi günlərlə bağlı tədbirlər davam etdirilmiş, görkəmli şəxsiyyətlərin və sənət adamlarının yubileyləri qeyd edilmiş, kitab müzakirələri, ustad və açıq dərslər, metodiki kurs, intellektual oyunlar təşkil olunmuşdur. Şərur yallılarının reyestrə alınması işi davam etdirilmiş, bir neçə yallının çəkilişi aparılmış və nota köçürülmüşdür.

Ötən ay muzeyləri 4 min 958-i əcnəbi vətəndaş olmaqla, ümumilikdə 26 min 64 tamaşaçı ziyarət etmiş, muzeylərə 158 yeni eksponat daxil olmuşdur.

 Muxtar respublika kitabxanalarına 59 adda 149 nüsxə çap məhsulu daxil olmuş, kitabxanalara yeni oxucu sayı 288, oxucu gəlişi 8 min 391 nəfər olmuşdur. Mədəniyyət evləri və klublarda əlamətdar və tarixi günlərlə bağlı 172 tədbir keçirilmiş, 75 sərgi açılmışdır. Naxçıvan Dövlət Musiqili Dram Teatrında Hüseyn Cavidin “Xəyyam”, M.T.Sidqi adına Naxçıvan Dövlət Kukla Teatrında “İnanmayaq tülkülərə”, Naxçıvan Dövlət Uşaq Teatrında  “Bu günün çay dəsgahı”, Babək Rayon Xalq Teatrında “Beş manatlıq gəlin” tamaşaları nümayiş etdirilmiş, musiqi kollektivlərinin muxtar respublikanın rayon və kəndlərində konsertləri təşkil olunmuşdur.

Naxçıvan Dövlət Film Fondu “Azərbaycan Kinosu Günü” layihəsi çərçivəsində muxtar respublikanın rayon və kəndlərində “Yarımçıq xatirələr”, “Nəsimi” filmlərini nümayiş etdirmiş, məktəblilər üçün kinoviktorina keçirilmişdir.

 Naxçıvan Muxtar Respublikası

Mədəniyyət Nazirliyinin mətbuat xidməti