“Naxçıvan” Universitetinin Pedaqoji fakültəsinin təşkilatçılığı ilə Azərbaycan dili və ədəbiyyat kafedrasının dosenti, filologiya üzrə fəlsəfə doktoru Aypara Behbudovanın şair-publisist Vaqif Məmmədova həsr olunmuş “Vətənə bağlı şair ömrü” kitabının təqdimatı keçirilib.
Tədbiri universitetin tədris və tərbiyə işləri üzrə prorektoru, iqtisad üzrə fəlsəfə doktoru Hüseyn Bağırsoylu açaraq bildirib ki, kitabda Aypara Behbudovanın şair Vaqif Məmmədovun yaradıcılığına dair on beş il ərzində apardığı tədqiqatların bəhrəsi olan ayrı-ayrı məqalələri toplanıb. Bu kitab şairin yaradıcılığının əsas istiqamətlərini və mövzu dairəsini geniş şəkildə işıqlandırmaq baxımından təqdirə­layiqdir.
Tədbirdə Azərbaycan dili və ədəbiyyat kafedrasının müdiri, dosent Nüşabə Məmmədovanın, həmin kafedranın müəllimləri İman Cəfərlinin, Nicat Yaqubovun, “Naxçıvan” Universiteti Elmi Kitabxanasının baş kitabxanaçısı Emilya Süleymanovanın və Azərbaycan dili və ədəbiyyat müəllimliyi ixtisasının IV kurs tələbəsi Könül Cəfərsoyun çıxışları dinlənilib.
Universitetin rektoru, professor İsmayıl Əliyev Aypara Behbudovanın elmi-pedaqoji fəaliyyətini yüksək dəyərləndirərək ona yeni yaradıcılıq uğurları arzulayıb.
Müəllif ona yaradılan şəraitə, göstərilən diqqətə görə minnətdarlıq edib.
Tədbirdə müəllifin yaradıcılığı ilə bağlı videoçarx nümayiş olunub.

Nuray ƏSGƏROVA