Naxçıvan Muxtar Respublikası Mədəniyyət Nazirliyinin təşkilatçılığı ilə muxtar respublikamızda ilk dəfə olaraq dram kollektivlərinin ifaçılıq müsabiqəsi keçirilir.
Müsabiqənin seçim turunda Naxçıvan şəhərindən 9, Ordubad rayonundan 6, Babəkdən 3, Şahbuzdan 3, Culfadan 2, Kəngərli və Sədərək rayonlarının hər birində 1 kollektiv olmaqla, ümumilikdə, 25 kollektiv iştirak edib.
Dram kollektivlərinin ifaçılıq müsabiqəsinin seçim turunun birinci mərhələsi bu il oktyabrın 16-da Naxçıvan şəhərində olub. Naxçıvan şəhəri, Culfa və Sədərək rayonlarından 12 dram kollektivinin iştirak etdiyi bu turda Naxçıvan şəhərindən “Nur” və “Sabit”, Culfa rayonundan isə “Haçadağ” kollektivləri əsas tura vəsiqə qazana biliblər.
Naxçıvan şəhərində davam etdirilən seçim turunun ikinci mərhələsində isə Babək, Şahbuz və Kəngərli rayonlarından, ümumilikdə, 7 dram kollektivi iştirak edib. Bu seçim turunda isə Babək rayonundan “Gənclik” və “Səbinə” kollektivləri fərqləniblər.
Seçim turunun yekun mərhələsi isə oktyabr ayının sonlarında Ordubad Rayon Mədəniyyət Evində keçirilib. Rayonun 6 dram kollektivinin iştirak etdiyi bu turda “Gilançay” dram kollektivi əsas turda iştirak etmək hüququ qazanıb.
Beləliklə, dram kollektivlərinin ifaçılıq müsabiqəsində Naxçıvan şəhərindən 2, Babək rayonundan 2, Ordubad və Culfa rayonlarının hər birindən 1 kollektiv olmaqla, 6 dram kollektivi iştirak edib.
Noyabrın 28-də isə Naxçıvan Dövlət Uşaq Teatrının səhnəsində müsabiqənin əsas turu olub. Bu tura vəsiqə qazanan dram kollektivləri tərəfindən maraqlı səhnəciklər təqdim olunub. Münsiflər heyətinin qərarına əsasən Culfa rayonunun “Haçadağ” dram kollektivi I, Babək rayonunun “Səbinə” dram kollektivi II, həmin rayonun “Gənclik” dram kollektivi isə III yerə layiq görülüblər.
Dram kollektivlərinin ifaçılıq müsabiqəsi yaxın günlərdə mükafatlandırma mərasimi ilə başa çatacaqdır.
Əli RZAYEV
