Muxtar respublikanın kompleks inkişafı sərhəd yaşayış məntəqəsi olan Sədərək rayonunu da əhatə edib. Rayonda geniş quruculuq işləri aparılıb, müasir infrastruktur yaradılıb, sakinlərin rahat yaşayışı təmin edilib. Həyata keçirilən tədbirlər Sədərək rayonunda sahibkarlıqla məşğul olanlar üçün də geniş imkanlar açıb.
Səmərəli fəaliyyəti ilə seçilən belə sahibkarlıq müəssisələrindən biri – rayondakı xalça sexi əsaslı təmir olunduqdan sonra yenidən fəaliyyətə başlayıb. Bu münasibətlə keçirilən tədbirdə Naxçıvan Muxtar Respublikasının iqtisadiyyat naziri Famil Seyidov və Sədərək Rayon İcra Hakimiyyətinin başçısı Həbib İbrahimov çıxış ediblər.
Çıxışlarda qeyd olunub ki, sahibkarlığın hərtərəfli dövlət qayğısı nəticəsində inkişaf etməsi daxili bazara çıxarılan məhsulların təhlükəsizliyinə tam əminlik yaradır. Naxçıvanda sahibkarlıqla məşğul olan təsərrüfat subyektlərinə banklar və kredit təşkilatları tərəfindən lazımi maliyyə yardımlarının verilməsi, hərtərəfli dəstək göstərilməsi onların qarşısında geniş perspektivlər açıb. Muxtar respublikamızda ümumi daxili məhsulun həcmində özəl bölmənin payının getdikcə artması da bu sahənin inkişafına göstərilən dövlət qayğısının təzahürü kimi dəyərləndirilməlidir.
Sonra xalça sexinə baxış olub. Bildirilib ki, daxili bazarla yanaşı, bu müəssisədə toxunan xalçalar xaricə də ixrac olunur. 10 nəfər qadının daimi işlə təmin olunduğu xalça sexində xalçatoxuma zalı, mətbəx və digər inzibati otaqlar mövcuddur. Sexin həyətyanı sahəsində həmişəyaşıl ağaclar, gül kolları və meyvə ağacları əkilib.
Burada çalışan xalça ustası Mahirə Vəliyeva ilə həmsöhbət olduq. O bildirdi ki, Naxçıvan Muxtar Respublikası Ali Məclisi Sədrinin 2018-ci il 7 mart tarixli Sərəncamı ilə “Rəşadətli əməyə görə” nişanı ilə təltif edilib. Əməyinin yüksək qiymətləndirilməsinə görə minnətdarlığını bildirən xalçaçı qeyd etdi ki, müəssisədə 2017-ci ildən etibarən Naxçıvan xalçaçılıq məktəbinə xas olan xalçalar toxunur. Belə xalçalar tarixən Azərbaycan xalça sənətini öz ənənəvi naxışları və elementləri, özünəməxsus rəng çalarları ilə zənginləşdirib. Həmçinin keyfiyyət amili də Naxçıvan xalçalarını fərqləndirən cəhətlərdəndir. Çalışacağıq ki, yaradılmış bu şəraitdən istifadə edərək Naxçıvanımızın xalçaçılıq ənənələrini bundan sonra da yaşadaq.
Qeyd edək ki, xalça sexinin yenidən fəaliyyətə başlaması Naxçıvanda qədim və zəngin ənənələrə malik bu el sənətinin yeni inkişaf mərhələsinə qədəm qoymasına imkan verəcək.
Sərxan İSMAYILOV
