Şərur Rayon Şahmat Məktəbində “Ulu öndər Heydər Əliyev gənc rəssamların gözü ilə” mövzusunda rəsm müsabiqəsinin üçüncü turu keçirilib.
Tədbirdə Naxçıvan Dövlət Rəsm Qalereyasının direktoru, Naxçıvan Muxtar Respublikası Rəssamlar Birliyinin üzvü Hökumə Məmmədli çıxış edərək bildirib ki, Azərbaycan mədəniyyətinin, o cümlədən təsviri sənətinin inkişafı ulu öndər Heydər Əliyevin adı ilə bağlıdır. Ümummilli lider hakimiyyətdə olduğu bütün dövrlərdə rəssamlığa da böyük diqqət və qayğı göstərib.
Qeyd olunub ki, keçirilən rəsm müsabiqəsi təhsil, mədəniyyət və turizm müəssisələrinin qarşılıqlı fəaliyyətinin səmərəli təşkili ilə bağlı 2017-2018-ci tədris ili üçün nəzərdə tutulmuş tədbirlər planına əsasən dahi şəxsiyyətin anadan olmasının 95-ci ildönümünə həsr edilib. Müsabiqə muxtar respublika məktəbləri şagirdlərinin yaradıcılıq qabiliyyətlərinin daha da inkişaf etdirilməsi, gənc nəslin mənəvi, bədii və estetik dünyagörüşünün formalaşması, gənclərdə vətənpərvərlik duyğularının daha da gücləndirilməsi məqsədi daşıyır.
Sonra gənc rəssamların çəkdikləri rəsm əsərləri münsiflər heyətinin iştirakı ilə qiymətləndirilib. Şərur rayonu üzrə keçirilən müsabiqənin bu mərhələsində Nisəbəyim Babayeva (Muğancıq-Mehrab kəndi, 9-cu sinif) I, Sinan Həsənov (Sərxanlı kəndi, 10-cu sinif), Çinar Məmmədov (Dəmirçi kəndi, 9-cu sinif) II, Nuray Məmmədova (Aralıq kəndi, 8-ci sinif), Məhəmməd Gözəlov (Dəmirçi kəndi, 11-ci sinif) III yerlərin diplomlarına layiq görülüblər. Qaliblər müsabiqənin növbəti mərhələsində iştirak etmək hüququ qazanıblar.
Qeyd edək ki, Naxçıvan Dövlət Rəsm Qalereyası və muxtar respublikanın rayon təhsil şöbələrinin birgə təşkil etdikləri müsabiqənin bundan əvvəlki mərhələləri Ordubad və Sədərək rayonlarında keçirilib. Oktyabrın 27-də start verilən müsabiqə gələn il mart ayının sonlarında başa çatacaqdır. Müsabiqədə rəsm çəkmək bacarığı olan VI-XI sinif şagirdləri iştirak edirlər. Rayonlar üzrə fərqlənən məktəblilər mart ayında Naxçıvan şəhərində keçiriləcək yekun tədbirdə iştirak edəcəklər. Müsabiqənin qalibləri və fərqlənənlər diplomlarla təltif olunacaqlar.
Əli RZAYEV
