Muzey bələdçiləri üçün növbəti seminar-treninq Cəlil Məmmədquluzadə adına Naxçıvan Muxtar Respublika Ədəbiyyat Muzeyində keçirilib.
Muxtar respublika Mədəniyyət və Turizm Nazirliyinin təşkilatçılığı ilə keçirilən seminar-treninqdə nazirliyin mədəni irs və muzey işi üzrə baş məsləhətçisi Qumral Məmiyeva “Muzey bələdçisinin davranış qaydaları” mövzusunda çıxış edərək bildirib ki, ötən ildən başlayaraq muzeylərdə keçirilən seminar-treninqlər muzey işçilərinin iş prinsipi və onların davranış qaydalarına əməl etmələri baxımından əhəmiyyətlidir. Muzey bələdçiləri üçün seminar-treninqlərin keçirilməsində əsas məqsəd muzeylərdə ekskursiya işinin təşkili ilə bağlı bələdçilərin nəzəri və praktik bilik səviyyəsini yüksəltməkdir. Seminar-treninqlərdə muzey bələdçiləri vəzifə funksiyalarını dərindən öyrənməyə səy göstərməklə yanaşı, muzey işi haqqında ətraflı məlumat əldə etmiş olurlar. Eyni zamanda bu tədbirlər muzey işçilərinin qədim diyarımızın bütün bölgələrində yerləşən muzeylərlə tanış olmasına şərait yaratmaq baxımından da önəmlidir.
Bildirilib ki, muxtar respublikamızda muzey fəaliyyətinin yüksək səviyyədə təşkil edilməsi üçün ardıcıl işlər görülür. Muzeylərimiz üçün yeni binaların inşa olunması, yenidən qurulması və maddi-texniki bazasının möhkəmləndirilməsi muzey işinin səviyyəsinin yüksəldilməsinə xidmət edir. Görülən işlər muzey işçiləri qarşısında bir sıra vəzifələr qoyur. Bu gün muzeylərimizdə hazırlıqlı, bilikli, xarici dilləri bilən, işlədiyi mədəniyyət ocağı haqqında ətraflı məlumata malik bələdçilərin olması çox vacibdir.
Diqqətə çatdırılıb ki, muxtar respublikamıza gələn turistlərə qədim diyarımız haqqında ətraflı məlumat vermək üçün muzey bələdçisi daim öz üzərində çalışmalı, tariximizi və mədəniyyətimizi dərindən bilməli, yeniliklərdən xəbərdar olmalıdır. Bu ilin birinci yarısında muzeylərimizə 217 mindən çox ziyarətçi gəlmişdir ki, onların 45 minə yaxını xarici ölkə vətəndaşlarıdır.
Sonra muzey bələdçisinin təqdimatında muzeyin ekspozisiyasına baxış olub, muzey bələdçilərinə metodik tövsiyələr verilib.
Naxçıvan Muxtar Respublikası
Mədəniyyət və Turizm Nazirliyinin mətbuat xidməti
