Naxçıvan Dövlət Universitetinin İncəsənət fakültəsinin gənclərin mənəvi tərbiyəsində, istedadlı musiqiçilərin yetişdirilməsində mühüm rolu var. Milli, eləcə də dünya klassik musiqilərini tələbələrə yüksək səviyyədə tədris edən, onun sirlərini gələcək nəsillərə çatdıran İncəsənət fakültəsi ötən illər ərzində uğurlu bir yol keçib.
18 sentyabr – Milli Musiqi Gününə həsr olunmuş tədbir fakültənin sənət hesabatı, yeni tədris ilinə uğurlu bir başlanğıc kimi bu fikirləri bir daha təsdiqlədi.
Tədbirdə fakültənin dekanı, sənətşünaslıq üzrə fəlsəfə doktoru Günay Məmmədova Milli Musiqi Gününün tarixi, dahi bəstəkar Üzeyir Hacıbəyovun həyat və yaradıcılığı, onun Azərbaycan musiqisinə verdiyi töhfələr haqqında danışdı.
Vokal ifaçılığı tarixi və nəzəriyyəsi ixtisası üzrə I kurs magistri Rahim Əsgərzadənin, solooxuma ixtisası üzrə II kurs tələbəsi Rüstəm İbrahimovun, həmin ixtisas üzrə III kurs tələbəsi İlkin Abdullayevin, kafedranın müəllimi, Naxçıvan Muxtar Respublikasının Əməkdar artisti Tural Bağırovun və digərlərinin ifalarında Üzeyir Hacıbəyovun “Cəngi”, “Sənsiz”, “O olmasın, bu olsun” musiqili komediyasından Məşədi İbadın mahnısı, Qara Qarayevin “Pyes”, Emin Sabitoğlunun “Sən olmuşam” əsərləri və “Ruhani” aşıq havası səsləndi.
Universitetin rektoru, AMEA-nın müxbir üzvü Saleh Məhərrəmov tədbirə yekun vuraraq qeyd etdi ki, Naxçıvan Muxtar Respublikasında musiqinin, xüsusilə də milli musiqinin, muğamın inkişafı istiqamətində məqsədyönlü tədbirlər həyata keçirilir. İncəsənət fakültəsinin keçdiyi inkişaf yolundan, burada çalışan pedaqoqların sənət uğurlarından bəhs edən rektor ali təhsilli musiqiçilərin yetişdirildiyi Naxçıvan Dövlət Universitetinin bundan sonra da muxtar respublikamızda milli musiqi mədəniyyətinin inkişafına töhfə verəcəyini bildirdi.
Xəbərlər şöbəsi
