Muxtar respublikamızda Milli Musiqi Günü ilə bağlı tədbirlər davam edir. Bu münasibətlə Naxçıvan Dövlət Filarmoniyasının Xalq Çalğı Alətləri Orkestrinin Naxçıvan şəhərindəki “Gənclik” Mərkəzində konserti olub.
Aparıcı bildirib ki, artıq bir neçə gündür, qədim diyarımızın paytaxtında və rayon mərkəzlərində Milli Musiqi Günü ilə əlaqədar tədbirlər və konsertlər təşkil olunur.
Qeyd edilib ki, Naxçıvan Dövlət Filarmoniyasının Xalq Çalğı Alətləri Orkestri filarmoniya yaradılarkən onun tərkibində fəaliyyətə başlayan ilk orkestrlərdən biri olub. Kollektivin tanınmış müğənni və xanəndələrinin ifalarını musiqisevərlər həmişə rəğbətlə qarşılayırlar. Bu gün də kollektiv yeni repertuarla musiqisevərlərin görüşünə gəlib. Orkestrin bədii rəhbəri Azərbaycan Respublikasının Əməkdar artisti Elman Əliyevdir.
Orkestr dahi Üzeyir Hacıbəyovun “Koroğlu” operasından “Uvertüra” və “Cəngi”ni ifa edib. Gənc müğənni İlkin Abdullayev Asəf Zeynallının Cəfər Cabbarlının sözlərinə yazdığı “Ölkəm”, Süleyman Ələsgərovun Füzulinin sözlərinə yazdığı “Vətənimdir”, Üzeyir Hacıbəyovun dahi şairimiz Nizaminin sözlərinə yazdığı romanslarını ifa edib. Azərbaycan Respublikasının Əməkdar artistləri Gülyanaq Fərzəliyeva Niyazinin “Vətən nəğməsi”ni, Mübariz Əsgərov isə Qəmbər Hüseynlinin “Ömrümün yazısan” mahnısını oxuyublar.

Sonra orkestr böyük bəstəkarımız Qara Qarayevin “Yeddi gözəl” baletindən “Aişənin rəqsi” musiqisini səsləndirib. Naxçıvan Muxtar Respublikasının Əməkdar artisti Azər Cəfərli bəstəkar Səid Rüstəmovun lirik “Qurban adına” mahnısını, Azərbaycan Respublikasının Əməkdar artisti Tural Nəcəfov isə Üzeyir Hacıbəyovun “Arşın mal alan” operettasından “Əsgərin ariyası”nı ifa ediblər.
Konsertdə müğənnilər Qəribə Həsənova və Nərmin Hüseynova Ramiz Mirişli, Tofiq Bakıxanov və başqalarının musiqi əsərlərini səsləndiriblər.
Konsert musiqisevərlərdə xoş ovqat yaradıb.
Muxtar respublikamızda Milli Musiqi Günü ilə bağlı konsertlər davam etdirilir. Növbəti konsert proqramı dünən Ordubad Rayon Mədəniyyət Evində təşkil edilib.

Əli RZAYEV