Bu ilin avqust ayından başlayaraq Azərbaycan-Fransa beynəlxalq arxeoloji ekspedisiyası AMEA-nın müxbir üzvü Vəli Baxşəliyev və Katerina Marronun rəhbərliyi ilə növbəti arxeoloji araşdırmalara başlayıb. Arxeoloji ekspedisiyanın əsas məqsədi qədim əkinçilik mədəniyyətlərinin formalaşması prosesini və insanların ətraf aləmlə tanışlığını öyrənmək, iqtisadi-mədəni əlaqələrin istiqamətini müəyyənləşdirməkdən ibarətdir.
Xatırladaq ki, tədqiqatların aparıldığı ilk günlərdə Eneolit dövrünün erkən mərhələsinə aid yaşayış yeri aşkar edilib. Bu, elmi ictimaiyyətin böyük marağına səbəb olub. Yaşayış yerinin keramika məmulatları arasında boyalı qablar da vardır. Maddi-mədəniyyət nümunələri ­ölkəmizin qədim sakinlərinin Yaxın Şərq ölkələri ilə əlaqələrini öyrənməyə, Eneolit dövrünün ardıcıl inkişaf mərhələlərini müəyyənləşdirməyə imkan verir.
Tədqiqat zamanı aşkar olunan maddi-mədəniyyət nümunələrinin bir qismi obsidian alətlərdən ibarətdir. Hazırda araşdırmalar davam etdirilməkdədir. Aşkar edilən maddi-mədəniyyət nümunələri Azərbaycan, Fransa, Almaniya, İtaliya, Türkiyə, Macarıstan və Avstraliyadan gələn mütəxəssislər tərəfindən tədqiq edilməkdədir.

Xəbərlər şöbəsi