Naxçıvan şəhərində fəaliyyət göstərən Naxçıvan Dövlət Rəsm Qalereyasının yaradılmasında məqsəd muxtar respublikamızda yaşayıb-yaradan rəssamların müxtəlif janrlarda işlədikləri əsərlər haqda rəsm həvəskarlarına məlumat vermək, rəsm əsərlərini qoruyub saxlamaq və gələcək nəslə çatdırmaqdır. Ümummilli lider Heydər Əliyevin adını daşıyan sarayın əsaslı təmirindən sonra binanın üçüncü mərtəbəsində rəsm qalereyası üçün geniş ekspozisiya zalı, iş otaqları, rəsm əsərlərinin mühafizəsi üçün fond, rəssam emalatxanası qalereya əməkdaşlarının ixtiyarına verilib.
Bu günlərdə həmin ünvanda olduq. Qalereya ilə bizi yaxından tanış edən direktor Hökümə Məmmədli bildirdi ki, hazırda 70-dən çox rəssamın 400-ə yaxın rəsm əsəri qalereyanın fondunda mühafizə olunur. Bu əsərlərdən 80-i ekspozisiya zalında sərgilənib.
Sərginin birinci guşəsində ulu öndər Heydər Əliyevə həsr edilmiş rəsm əsərləri özünə yer alıb. Bu rəsmlərdə Azərbaycanın müstəqilliyi və sonrakı dövrdə bayrağımızın zirvələrdə dalğalanması böyük ustalıqla təsvir edilib.

Ekspozisiyanın ikinci guşəsi tarixi-mədəniyyət abidələrinə həsr edilib. Burada ulu keçmişimizdən soraq verən abidələrimiz rəssam təfəkkürünün gücü ilə kətana köçürülüb. Naxçıvanın füsunkar gözəlliklərini əks etdirən və mənzərə janrında çəkilmiş əsərlər üçüncü guşədə sərgilənib. Xalça Muzeyi tərəfindən hədiyyə edilən, XX əsrə məxsus rəngli saplarla toxunmuş xalçalar da ekspozisiyaya daha bir gözəllik bəxş edir.
Qalereyada 2012-ci ildən başlayaraq Naxçıvanda keçirilən “Naxçıvan – Bəşəriyyətin beşiyi” adlı beynəlxalq rəsm festivallarında iştirak edən xarici ölkə rəssamlarının hədiyyə etdikləri əsərlər də özünə yer alıb.
Rəsm qalereyasına ölkəmizin digər bölgələrindən üz tutan qonaqlarla yanaşı, xarici ölkələrdən turistlər də gəlirlər. Qonaqlar “Möminə xatın”, “Naxçıvan abidələri”, “Qarabağlar türbəsi”, “Yusif Küseyir oğlu türbəsi”, “İmamzadə” və digər rəsm əsərlərinə tamaşa etdikcə Naxçıvanın qədim tarixə malik olduğunu görürlər.

Telli MUSTAFAYEVA