Naxçıvan Muxtar Respublikasının Rəssamlar Birliyində Elçin Orucovun yaratdığı “Tartoniya aləmi”nin sevimli qəhrəmanları Tartoniklərə həsr olunmuş sərgiyə baxış keçirilib. Tədbiri Azərbaycan Respublikasının Əməkdar rəssamı, Naxçıvan Muxtar Respublikası Rəssamlar Birliyinin sədri Ülviyyə Həmzəyeva açıb.
Qeyd olunub ki, “Tartoniya” adlanan planetin balaca və nəcib sakinləri olan Tartoniklər Ukraynanın Xarkov şəhərində həyata vəsiqə qazanıblar. Qeyri-adi obrazların müəllifi kimi Ukrayna və Türkiyə mediasının diqqətini özünə cəlb edən Elçin Orucov plastilindən ən çox animasiya personajı yaradan insan kimi Ukraynanın milli rekordlar kitabına düşüb. Onun layihəsini bədii dəyərlər baxımından incəsənət, dizayn və animasiya modelləşdirilməsində uğurlu addım kimi dəyərləndirən mütəxəssislər istedadlı həmyerlimizin yaratdığı “Tartonik obrazı”nın tezliklə dünya animasiya filmləri sferasına nüfuz edəcəyini vurğulayıblar.
Sərgidə çıxış edən Elçin Orucov öncə tədbir iştirakçılarını, xüsusilə uşaqları salamlayaraq bildirib ki, ilkin olaraq bu personajlara adi gözlə baxıb. Sonralar bu barədə fikirlərini Xarkov şəhərindəki animasiya filmləri ilə məşğul olan mütəxəssislərlə bölüşüb. Animasiya mütəxəssislərinin qeyri-adi personajlara göstərdiyi xüsusi maraq naxçıvanlı sənətkar Elçin Orucovun təxəyyülündə yaşatdığı “Tartonik dünyası”nın nəcib sakinlərini hərəkətə gətirib. Bu sahədə son on ildə minə yaxın personajlar yaradan Elçin Orucov dünyanın animasiya filmləri ailəsinə yeni və fərqli obrazla daxil olmağı bacarıb. Hazırda onun personajları əsasında Türkiyənin İzmir şəhərində çoxseriyalı cizgi filmi çəkilir. Tədbirə qatılanlarla yaradıcılıq uğurlarını bölüşən Elçin Orucov yaratdığı personajlar əsasında çəkilən animasiya serialının tezliklə televiziya ekranlarına çıxacağını bildirib. Həmçinin müəllif Naxçıvan Muxtar Respublikasının Rəssamlar Birliyində keçirilən sərgini Tartoniklərin ilk sərgisi olduğunu vurğulayıb. O, sərginin keçirilməsinə köməklik edən hər kəsə öz dərin minnətdarlığını ifadə edib.
Qeyd edək ki, Tartoniklər naxçıvanlı uşaqlarla yanaşı, böyüklərin də diqqətini cəlb etməyi bacardı. Arzu edirik ki, onlar həmyerlimizi dünyada tanıtsın.
Xəbərlər şöbəsi
