Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il iyulun 27-də imzaladığı Sərəncama uyğun olaraq, müvafiq nazirlik, komitə və digər təşkilatların əməkdaşları Naxçıvan Dövlət Universitetində olur, tələbələrlə görüşürlər.
Sərəncamdan irəli gələn vəzifələrin icrası ilə bağlı Naxçıvan Muxtar Respublikası Mədəniyyət və Turizm Nazirliyinin tədbirlər planına uyğun olaraq, Azərbaycan Respublikasının Xalq artistləri Kamran Quliyev, Rza Xudiyev, Həsən Ağasoy Naxçıvan Dövlət Universitetində olub, ali məktəbin İncəsənət fakültəsinin Aktyor sənəti ixtisası üzrə təhsil alan tələbələrlə görüşüb, onlara ustad dərsləri keçiblər.
Universitetin İncəsənət fakültəsinin dekanı, Azərbaycan Respublikasının Əməkdar artisti Mübariz Əsgərov Naxçıvan teatrının səhnəsində yaddaqalan və unudulmaz obrazlar yaradan, həmişə surətin daxili aləmini yüksək sənətkarlıqla ortaya çıxararaq böyük tamaşaçı sevgisini qazanan tanınmış aktyorların tələbələrə ustad dərsləri keçmələrinin əhəmiyyətindən danışıb. O, aktyor olmaq üçün ilk addımlarını atan gənclərin bu dərslərdə iştirakının böyük səmərə verəcəyini vurğulayıb.
Görüşdə Cəlil Məmmədquluzadə adına Naxçıvan Dövlət Musiqili Dram Teatrının direktoru, Azərbaycan Respublikasının Xalq artisti Rza Xudiyev sərəncamdan irəli gələn vəzifələri nəzərə çatdırıb. Qeyd olunub ki, tələbələrlə bu cür görüşlərin daimi keçirilməsi nəzərdə tutulub. Xalq artistinin sözlərinə görə, ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi, öz növbəsində, incəsənət sahəsində bacarıqlı və eyni zamanda yaradıcı gənc kadrların da hazırlanmasına böyük imkanlar yaradacaqdır. Natiq həmçinin zəngin və çox qədim Azərbaycan incəsənətinin gənclərin əxlaqi-mənəvi tərbiyəsindəki rolundan, ölkəmizdə mədəniyyətə, incəsənətə göstərilən yüksək qayğıdan, sənət adamlarının yaradıcılığına verilən qiymətdən danışıb.
Naxçıvan Muxtar Respublikası Mədəniyyət və Turizm Nazirliyinin əməkdaşı, Azərbaycan Respublikasının Xalq artisti Kamran Quliyev “Teatrda aktyor, rejissor münasibətləri”, Cəlil Məmmədquluzadə adına Naxçıvan Dövlət Musiqili Dram Teatrının aktyoru, Azərbaycan Respublikasının Xalq artisti Həsən Ağasoy “Aktyorun rol üzərində işi” mövzularında çıxışlar ediblər. Tanınmış sənət adamları həmçinin universitetdə teatr və aktyor sənətinin tədrisi üçün yaradılan şəraitdən məmnunluq ifadə ediblər, gənc istedadların üzə çıxarılmasında, istiqamətləndirilməsində əllərindən gələni əsirgəməyəcəklərini söyləyiblər.
Tələbələrdən Fidan Qasımova, Səyyad Məmmədov, Mehri Nəbiyeva və başqaları müxtəlif obrazlar ifa ediblər. İncəsənət xadimləri yeni aktyor məktəbinin inkişaf etdirilməsi və peşəkarlıq səviyyəsinin artırılması üçün tələbələrə bir sıra tövsiyələr veriblər.
Görüş zamanı aktyor və tamaşaçı münasibətləri, müasir aktyor texnikası, kamera önündə aktyorun işi və digər məsələlər də müzakirə olunub, tələbələri maraqlandıran suallar cavablandırılıb.
Mina QASIMOVA
