Dünən TQDK ali təhsil müəssisələrinin V ixtisas qrupuna (xüsusi qabiliyyət tələb edən ixtisaslara), 9 illik və tam (11 illik) orta təhsil bazasından orta ixtisas təhsili müəssisələrinə (kolleclərə) qəbul olunmaq istəyən əvvəlki illərin məzunları üçün qəbul imtahanları keçirib.
Qeyd olunan imtahanlar, bütövlükdə, ölkəmizin 14 şəhər və rayonunda – Bakı, Naxçıvan, Gəncə, Tovuz, Sumqayıt, Mingəçevir, Şəki, Ağcabədi, Göyçay, Şirvan, Salyan, Lənkəran, Masallı və Xaçmazda 64 imtahan mərkəzində təşkil olunub və bütün binalarda eyni vaxtda – saat 1000-da başlanıb.
Naxçıvan şəhərində Heydər Əliyev adına tam orta məktəbdə və Naxçıvan şəhər 1, 7, 14 nömrəli tam orta məktəblərdə təşkil olunan imtahanlarda 2144 abituriyent iştirak edib. İmtahan keçirilən məktəblərin hamısında əvvəlcədən görülən hazırlıq işləri, abituriyentlərin bilik və bacarıqlarını üzə çıxarmaq üçün yaradılan şərait imtahanların şəffaf keçirilməsini təmin edib. İmtahan başlanmazdan əvvəl imtahan keçiriləcək məktəblərin önündə həyəcanlı görünən abituriyentlər, onların valideynləri ilə görüşüb həmsöhbət olduq. Onların fikirlərini öyrəndik. Valideyn Rəşadət Dadaşlı dedi:
– Qızım Turac V ixtisas qrupu üzrə imtahan verəcək. Övladımın ən böyük arzusu tələbə adını qazanmaqdır. Ötənilki imtahanlarda iştirak edib, ancaq müvəffəqiyyət qazana bilməyib. Amma məqsədinə çatmaq üçün 1 il ərzində öz üzərində ciddi çalışıb. Bu dəfə əminik ki, tələbə adını qazanacaq.
Saatlar 1000-u göstərəndə imtahan başladı. İmtahan qurtarana kimi biz də müşahidələrimizi apardıq. İmtahanın gedişi zamanı abituriyentlər heç bir qayda pozuntusuna yol verməyərək diqqətlərini ancaq test tapşırıqlarına yönəltdilər. Ümumiyyətlə, imtahanda təşkilatçılıq yüksək səviyyədə idi. İmtahanın ümumi rəhbəri Qasım Əliyev bildirdi ki, abituriyentlərin öz bilik və bacarıqlarını göstərmək üçün ayrılan 2 saat ərzində imtahan otağında onların yüksək fəallığını müşahidə edib. Hiss etmək çətin deyildi ki, tələbə arzusunda olan gənclər qəbul imtahanına yüksək inam və ümidlə gəliblər.
İmtahan başa çatdıqdan sonra bir neçə abituriyentlə həmsöhbət olduq. Naxçıvan şəhərindən olan Aliyə İsayevanın üzündəki təbəssümdən hiss olunurdu ki, sualları yaxşı cavablandırıb. Dedi ki, yaradılan sakitlik və normal şərait hesabına o, imtahanda məhsuldar işləyə bilib. Sualların böyük əksəriyyətinə dəqiq cavab verdiyinə əmindir. İnanır ki, tələbə adına layiq görüləcək. Söhbətimizə qoşulan digər abituriyentlər də imtahanların təşkilindən razılıqlarını ifadə etdilər.
Xəbərlər şöbəsi
