Azərbaycan Respublikasının Prezidenti yanında Gənclər Fondunun maliyyə dəstəyi ilə Bakı şəhərindəki Monolit Plazada “Bizim sahibkarlıq fəaliyyətimiz” (Enactus) X Azərbaycan milli yarışı keçirilib.
Yarışın məqsədi gəncləri sahibkarlıq fəaliyyətinə təşviq etmək, tələbələrə azad sahibkarlıq ideyasını aşılamaq, onların təşkilatçılıq, idarəçilik və komandada işləmək bacarıqlarını inkişaf etdirməkdən ibarət olub.
Yarışda Azərbaycan Dövlət İqtisad, Dövlət Aqrar, Dövlət Mədəniyyət və İncəsənət, Texnologiya, Memarlıq və İnşaat, Gəncə Dövlət, Sumqayıt Dövlət, Naxçıvan Dövlət və “Naxçıvan” universitetlərinin komandaları iştirak ediblər. Tədbirdə çıxış edənlər “Enactus Azərbaycan”ın fəaliyyətindən danışıb, gənclərin fəallığını vurğulayıblar.
Sonra püşkatma mərasimi olub. Püşkatmadan sonra komandalar və “Enactus Azərbaycan”ın qonaqları birlikdə üç mövzu əsasında forum keçiriblər. Komandaların seçdikləri mövzu ətrafında müzakirələr olub.
Birinci liqa üzrə Azərbaycan Dövlət Aqrar Universiteti, Sumqayıt Dövlət Universiteti, ikinci liqa üzrə isə “Naxçıvan” Universiteti və Azərbaycan Dövlət Mədəniyyət və İncəsənət Universiteti finalda iştirak etmək hüququ qazanıblar.
“Naxçıvan” Universitetinin komandası iki layihə ilə çempionata qatılıb. Layihələrdən birincisi qədim xalq sənətimiz olan keçəçiliyin təbliği və yaşadılmasına xidmət edən “Güzəm”, digəri isə gözdən əlil vətəndaşlarımızın və bölgəmizə gələn turistlərin rahat hərəkətini tənzimləyən “Bələdçim” layihələri olub.
Azərbaycan ali məktəblərinin təqdim etdikləri layihələr içərisində “Ən yaxşı sosial layihə” üzrə “Naxçıvan” Universitetinin “Bələdçim” layihəsi nominasiyanın qalibi adını qazanıb, komandaya diplom təqdim edilib.
Enactus milli yarışının 10 illiyi münasibətilə “Naxçıvan” Universitetinin dekanı, komandanın məsləhətçisi, dosent Elbrus İsayevə “Enactus Azərbaycan”ın “Ən fəal məsləhətçi” nominasiyasının qalibi diplomu təqdim olunub.
Məlumat üçün qeyd edək ki, “Naxçıvan” Universitetinin “Enactus” komandası ötən tədris ilində yarışda “səsli kitab”, “ikili istehsal”, “yenilənən bərəkət” layihələri ilə çıxış etmiş, “Enactus” komandasının təqdim etdiyi “səsli kitab” layihəsi yarışda iştirak edən Azərbaycan ali təhsil müəssisələri içərisində “ən yaxşı biznes və sahibkarlıq yarışması tətbiq olunan layihə” nominasiyası üzrə təltif olunmuş və II yerə layiq görülmüşdü.
Nuray Əsgərova
