Naxçıvan Dövlət Universitetinin Baytarlıq təbabəti ixtisasının yeni binasının istifadəyə verilməsi bu ixtisasın aqrar sektorun inkişafı, ərzaq proqramının yerinə yetirilməsi və əhalinin ekoloji cəhətdən təmiz, sağlam qidalanmasında əhəmiyyətli rol oynadığını bir daha təsdiqləyir.
Naxçıvan Muxtar Respublikası Ali Məclisinin Sədri binanın açılışı zamanı laboratoriya və fənn kabinələri ilə tanış olarkən bildirib ki, Baytarlıq təbabəti ixtisası üçün müasir tədris şəraitinin yaradılması muxtar respublikada ərzaq təhlükəsizliyi tədbirlərinin də gücləndirilməsinə stimul verir. Müəllim və tələbələr yaradılan şəraitdən bəhrələnərək bundan sonra daha əzmlə çalışmalı, baytar həkimlərin mütəxəssis kimi formalaşması üçün digər əlaqəli müəssisə və təşkilatlarla əlaqə qurulmasına, muxtar respublikada hazırda fəaliyyət göstərən laboratoriyalarda dərslərin əyani şəkildə keçirilməsinə diqqət artırılmalıdır.
Bu günlərdə Baytarlıq təbabəti ixtisasının müəllim-tələbə kollektivi Naxçıvan Muxtar Respublikası Dövlət Gömrük Komitəsinin laboratoriyasına gedərək orada qurulmuş cihazların iş prinsipi ilə tanış olublar. Tələbələr ərzaq məhsullarının keyfiyyət göstəricilərinin yoxlanma qaydalarını öyrəniblər.
Müəllim və tələbələr Naxçıvan Muxtar Respublikası İqtisadiyyat və Sənaye Nazirliyinin “İstehlak Mallarının Ekspertizası Mərkəzi” Məhdud Məsuliyyətli Cəmiyyətilə də tanış olublar. Məhdud Məsuliyyətli Cəmiyyət kimi fəaliyyət göstərən laboratoriyanın iş prinsipi və alınmış nümunələrin analizlərinin aparılması tələbələrdə bu işə marağı daha da artırıb.
Tələbələr “Gəmiqaya Holdinq” Şirkətlər İttifaqının təsərrüfat bölməsində inəklərin saxlanma və yemlənmə qaydalarını, süd sağımı prosesini və digər işlərin yerinə yetirilmə ardıcıllığını öyrəniblər.
Baytarlıq təbabəti kafedrasının müdiri, baytarlıq üzrə fəlsəfə doktoru Yunis Rüstəmli bildirib ki, bu ixtisasın mükəmməl tədrisi, tələbələrin təcrübi biliklərinin artırılması məqsədilə muxtar respublikada fəaliyyət göstərən müxtəlif aidiyyəti müəssisələrlə əməkdaşlıq, birgə fəaliyyət bundan sonra da davam etdiriləcək.
Mehriban Sultan
