Tələbə Qəbulu üzrə Dövlət Komissiyasının Naxçıvan Muxtar Respublikası Regional Bölməsindən aldığımız məlumata görə, fevralın 2-də başlanılan və ayın 12-dək davam edəcək seminarların növbətisi Naxçıvan şəhər 7 nömrəli tam orta məktəbdə təşkil olunub. Seminarlarda 2015-ci ildə keçiriləcək sınaq və ali məktəblərə qəbul imtahanlarında nəzarətçi-müəllim kimi iştirak edəcək təhsil işçiləri iştirak edirlər.

Seminarda zal nəzarətçisinin hüquq və vəzifələri, davranış qaydaları, imtahan prosesi, abituriyentlərlə işin təşkili və digər zəruri məsələlər müəllimlərin diqqətinə çatdırılıb. Tədbir zamanı real imtahanda tətbiq edilən sənədlərdən istifadə olunub, sözügedən komissiya tərəfindən hazırlanmış imtahan texnologiyasına aid videoçarx nümayiş etdirilib. Bildirilib ki, Tələbə Qəbulu üzrə Dövlət Komissiyasının Naxçıvan Muxtar Respublikası Regional Bölməsi tərəfindən nəzarətçi-müəllimlərin bundan əvvəlki fəaliyyətləri üzrə araşdırmalar aparılması müəllimlərin fəaliyyətlərinin təkmilləşdirilməsi, onlarla təşkil olunan treninqlərin məzmununun və metodunun yenidən işlənməsi, növbəti imtahanlar üçün nəzarətçi seçimi meyarlarının korrektə edilməsi, muxtar respublika üzrə orta ümumtəhsil müəssisələrinin qabaqcıl müəllimlərinin imtahanların təşkilində aktiv iştirakının təmin olunması baxımından mühüm əhəmiyyət kəsb edir.
Tədbirdə imtahanların obyektiv və şəffaf keçirilməsində zal nəzarətçilərinin rolundan, üzərlərinə düşən vəzifələrin məsuliyyətindən, təhsilin müxtəlif pillələrinə və səviyyələrinə layiqli gənclərin seçilməsində nəzarətçi-müəllimlərin xidmətlərindən bəhs olunub. Qeyd edilib ki, ölkəmizdə, eləcə də muxtar respublikamızda digər sahələr kimi, təhsil sahəsi də yüksələn xətlə inkişaf edir. Bu gün gənclərimiz ölkə­mizin və dünyanın müxtəlif nüfuzlu ali təhsil müəssisələrində təhsil alır, regional və beynəlxalq olimpiadalarda uğurlu nəticələr əldə edirlər. Bu və digər nailiyyətlərin əldə olunmasında müəllimlərimizin əməyi danılmazdır.
Qeyd edək ki, seminarlara 700-ə yaxın nəzarətçi-müəllim cəlb edilib.

Xəbərlər şöbəsi