Naxçıvan Muxtar Respublikası Ali Məclisinin Sədri yanında Gənclər Fondu, Naxçıvan Muxtar Respublikası Gənclər və İdman, Təhsil nazirlikləri, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi və “Naxçıvan Muxtar Respublika Gənclərin İntellektual İnkişaf Mərkəzi” İctimai Birliyinin birgə təşkilatçılığı ilə “Nuh yurdu” intellektual bilik yarışının final mərhələsi keçirilib. İntellektual bilik yarışının keçirilməsində məqsəd yeniyetmələrin intellektual səviyyəsini, dünyagörüşünü, zehni inkişafını artırmaq, onların asudə vaxtlarının səmərəli təşkili istiqamətində yeni üsullar tətbiq etmək olub. Naxçıvan şəhərindəki Gənclər Mərkəzində keçirilən və 12 komandanın iştirak etdiyi final yarışının nəticələrinə görə, birinci yerə Ordubad rayonunun “Dübəndi”, ikinci yerə Babək rayonunun “İstedadlar”, üçüncü yerə isə Naxçıvan şəhərinin “Nəqşi-cahan” komandaları layiq görülüblər.
Qalib komandalara təşkilatçılar tərəfindən diplom, fəxri fərman, kubok və qiymətli hədiyyələr təqdim olunub.

Ceyhun MƏMMƏDOV