15-17 sentyabr 2014-cü il tarixlərində Türkiyə Cümhuriyyətinin paytaxtı Ankara şəhərində Atatürk Mədəniyyət, Dil və Tarix Yüksək Qurumu tərəfindən XVII Beynəlxalq Türk Tarix Konqresi təşkil edilib. 15-dən artıq ölkəni təmsil edən 238 nümayəndənin iştirak etdiyi konqresdə Azərbaycanı 4 nəfəri Naxçıvandan olmaqla, 30 elm adamı təmsil edib. Dünyanın müxtəlif ölkələrini təmsil edən tarixçi, filoloq, iqtisadçı alimlərin iştirak etdiyi konqresin plenar iclasında Türk Tarix Qurumunun rəhbəri Məhmət Əli Bəyxan çıxışında Naxçıvanda elmin inkişafına da toxunub.
AMEA Naxçıvan Bölməsinin sədri, akademik İsmayıl Hacıyev və bölmənin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev konqresin bölmə iclaslarına sədrlik ediblər. Konqresdə AMEA Naxçıvan Bölməsinin sədri, akademik İsmayıl Hacıyevin “Azərbaycanın Naxçıvan bölgəsinin qorunmasında Araz-Türk Cümhuriyyətinin fəaliyyəti”, bölmənin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyevin “Göytürk yazılarında “Bulaq” boy adı və türk tarixində əksi”, Tarix, Etnoqrafiya və Arxeologiya İnstitutunun əməkdaşı, tarix üzrə fəlsəfə doktoru Sara Hacıyevanın “Orta əsrlər dövründə Naxçıvanda daşyonma mərkəzləri haqqında” mövzularında elmi məruzələri maraqla dinlənilib və geniş müzakirələr aparılıb.
AMEA Naxçıvan Bölməsindən verilən məlumata görə, konqresin keçirildiyi günlərdə AMEA Naxçıvan Bölməsindən olan nümayəndələr Türk Tarix Qurumu, Türk Dil Qurumu, Yunus Əmrə İnstitutunda olublar. Adıçəkilən qurumların rəhbərləri ilə görüşlər keçirilib və gələcəkdə əməkdaşlıq sazişlərinin imzalanması üçün ilkin razılaşmalar əldə olunub. Həmçinin AMEA Naxçıvan Bölməsinin sədri, akademik İsmayıl Hacıyev Türkiyə Strateji Araşdırmalar Mərkəzinin rəhbəri Həsən Cəlal Gözəllə görüşüb, mərkəzin çap etdiyi 21 cildlik “Türklər” ensiklopediyasının bütün cildlərinin əldə olunması istiqamətində danışıqlar aparılıb, naxçıvanlı müəlliflərin bir sıra kitabları mərkəzə təqdim edilib.
Elnur KƏLBİZADƏ
