Tələbə Qəbulu üzrə Dövlət Komissiyasının Naxçıvan Muxtar Respublikası Regional Bölməsi tərəfindən yaradılmış “Nəzarətçi-müəllimlərin qeydiyyatı” məlumat bazasına muxtar respublikanın ümumtəhsil məktəblərindən 698 nəfər nəzarətçi-müəllim haqda məlumatlar daxil edilib. Onlardan 200 nəfəri test imtahanlarına ilk dəfə nəzarətçi qismində cəlb olunacaq müəllimlərdir. Hazırda isə sözügedən bölmə tərəfindən məktəblərdə keçiriləcək sınaq-test imtahanlarına nəzarətçi qismində cəlb olunacaq müəllimlərlə seminar-məşğələlərin keçirilməsi üçün hazırlıqlara başlanılıb. Nəzarətçi-müəllimlərlə ilk seminar-məşğələ yanvarın 27-də Ordubad rayonunda keçirilib. Naxçıvan şəhərində və bölgələrimizdə davam etdiriləcək məşğələlər fevralın 5-dək davam edəcək.
Bu barədə məlumat redaksiyaya Tələbə Qəbulu üzrə Dövlət Komissiyasının Naxçıvan Muxtar Respublikası Regional Bölməsindən daxil olub. Məlumatda o da bildirilib ki, seminar-məşğələlərin keçirilməsində məqsəd nəzarətçi-müəllimləri qəbul imtahanının texnologiyası ilə yaxından tanış etmək, imtahanları təlimata uyğun keçirməyə hazırlamaqdır. Seminar-məşğələlər regional bölmənin məsul əməkdaşları tərəfindən aparılacaq. Məşğələlərdə iştirak edən müəllimlər, xüsusən bu prosesə ilk dəfə cəlb edilən nəzarətçilər aprel ayından etibarən TQDK tərəfindən keçiriləcək sınaq imtahanlarında nəzarətçi kimi iştirak edəcəklər. Bu da onların seminarlarda əldə etdikləri nəzəri bilikləri təcrübədə tətbiq etmələrinə kömək edəcək. Sınaq imtahanlarında nəzarətçi kimi özünü doğruldan müəllimlər qəbul imtahanlarına cəlb olunacaqlar.
Xəbərlər şöbəsi
