Alman Akademik Mübadilə Xidmətinin (DAAD) Bakı Məlumat Mərkəzinin rəhbəri xanım Nikola Ulliş Naxçıvan Dövlət Universitetində olmuşdur. Universitetin rektoru, professor Saleh Məhərrəmov Naxçıvan Dövlət Universitetində dünya təhsil sisteminə inteqrasiya, ali təhsil sahəsində ümumavropa təcrübəsinin öyrənilməsi və tətbiqi istiqamətində görülən işlərdən danışmışdır. Qeyd olunmuşdur ki, Naxçıvan Dövlət Universiteti dünyanın tanınmış 80 ali məktəbi ilə beynəlxalq əməkdaşlıq edir. Ali təhsil müəssisəsi bir çox beynəlxalq layihələrdə, o cümlədən “Tempus” proqramı çərçivəsində həyata keçirilən 5 layihədə uğurla təmsil olunmaqdadır.
Tələbə mobilliyinin artırılması nəticəsində universitetin bir neçə tələbəsi Gürcüstanın Acarıstan Muxtar Respublikasının Şota Rustaveli adına Batumi Dövlət Universitetində, Cənubi Koreyanın Kimçonq Universitetində təhsilini davam etdirir. Bundan başqa, “ERASMUS MUNDUS” layihəsi çərçivəsində 2 nəfər İspaniyanın Santyaqo de Kompostela Universitetində, 1 nəfər isə İtaliyanın Tuskua Universitetində doktorantura təhsili alır. Rektor Almaniya ilə də tələbə mübadiləsinin genişləndirilməsinin əhəmiyyətindən danışmışdır.
Xanım Nikola Ulliş təmsil etdiyi qurum haqqında ətraflı məlumat verərək Alman Akademik Mübadilə Xidmətinin Almaniyadakı ali məktəblərin beynəlxalq əməkdaşlıq sahəsində ən böyük maliyyələşdirici qurum olduğunu bildirmişdir.
Sonra tələbə və magistrantların iştirakı ilə yığıncaq keçirilmişdir. Yığıncağı giriş sözü ilə universitetin beynəlxalq əlaqələr üzrə prorektoru, riyaziyyat üzrə fəlsəfə doktoru Anar Kazımov açaraq Almaniyada təhsil imkanları haqqında məlumat vermişdir. Nikola Ulliş Alman Akademik Mübadilə Xidmətinin Bakı Məlumat Mərkəzinin iki ölkə arasında təhsil sahəsində əməkdaşlıq çərçivəsində yaradıldığını qeyd edərək bu qurumun fəaliyyət istiqamətlərindən danışmışdır.
Sonra Almaniyada yay dil kurslarında iştirak etmək üçün universitetin II və III kurs tələbələrinin, I kurs magistrantlarının qatıldığı onlayn imtahan keçirilmişdir. İmtahanın nəticələri 2014-cü ilin mart-aprel aylarında açıqlanacaq.
Mehriban SULTAN
