Muxtar respublikada məktəblilərin əqli və məntiqi düşüncə qabiliyyətinin formalaşmasında xüsusi əhəmiyyəti olan şahmatın kütləviliyinin artırılmasına və bu sahənin inkişafına yüksək qayğı göstərilir. Şahmatın maddi-texniki bazası möhkəmləndirilir, məktəblərdə şahmat fənninin tədrisi diqqətdə saxlanılır. Uşaq və gənclərin bu idman növünə marağının artırılması və bu istiqamətdə inkişaf etmələri yönündə mühüm addımlar atılır.
Naxçıvan Muxtar Respublikası Ali Məclisi Sədrinin şahmata olan diqqəti nəticəsində 2002-ci ildə Naxçıvan Şahmat Federasiyasının yaradılması ilə muxtar respublikada şahmata baxış tərzi dəyişmiş, federasiyanın düzgün seçilmiş inkişaf strategiyası nəticəsində uşaqların bu idman növünə marağı artmış, yeni gənc istedadların axtarışı yönündə zəruri işlər görülmüşdür. Bu gün muxtar respublikada məktəblilər arasında müxtəlif kateqoriyalar üzrə şəhər və rayon birincilikləri ilə yanaşı, muxtar respublika ərazisində mütəmadi olaraq tempo yarışları, müxtəlif beynəlxalq yarışlar keçirilir, Naxçıvan şahmat üzrə ölkə və beynəlxalq səviyyəli yarışlara ev sahibliyi edir. Naxçıvan şəhərində Şahmat Mərkəzi, rayon mərkəzlərində yeni şahmat məktəblərinin tikilib istifadəyə verilməsi, məktəblərdə şahmat siniflərinin lazımi avadanlıqlarla təchiz edilməsi, şahmatın tədrisi üçün dərsliklərin çap olunması, eləcə də müəllimlərin bilik və bacarıqlarının inkişafı istiqamətində həyata keçirilən tədbirlərin nəticəsidir ki, bu gün muxtar respublikada böyüməkdə olan gənc şahmatçılar müxtəlif səviyyəli yarışlarda layiqli yerlər tutur.
Bunlarla yanaşı, şahmatı tədris edən müəllimlərin peşəkarlıq səviyyəsinin artırılması, təhsil müəssisələrinin bacarıqlı və bilikli müəllimlərlə təmin olunması diqqətdə saxlanılıb, ötən müddət ərzində Naxçıvan Muxtar Respublikası Təhsil Nazirliyi və Şahmat Federasiyasının birgə təşkilatçılığı ilə keçirilən sertifikasiya imtahanlarında uğurlu nəticə göstərən 505 müəllimə ümumtəhsil məktəblərində şahmat fənnini tədris etməsinə icazə hüququ verən sertifikat təqdim olunub.
Muxtar respublikada şahmatın inkişafında böyük rol oynayan Naxçıvan Şahmat Federasiyası ümumtəhsil məktəblərinin şahmat fənninə dair dərslik, dərs vəsaiti və digər tədris-metodik ədəbiyyatlara olan ehtiyacının qarşılanmasına yaxından köməklik göstərir. Ötən müddət ərzində şahmatın yüksək səviyyədə tədrisini təmin etmək üçün federasiya tərəfindən şahmatın əsaslarının şagirdlərə öyrədilməsində müəllimlərə yaxın köməkçi olan “Pillə-pillə” kitabı və şagirdlərin şahmata olan marağını, artan tələbatı nəzərə alaraq dərslik kimi nəzərdə tutulan “Debütdə buraxılmış səhvlərə aid 1000 oyun” kitabı nəşr olunaraq ümumtəhsil məktəblərinə verilib. Şahmat Federasiyası tərəfindən ümumtəhsil və şahmat məktəblərinə hədiyyə olunan kitablar mövcud qaydalara uyğun şəkildə məktəblərin fonduna daxil edilib və səmərəli istifadəsi Təhsil Nazirliyi tərəfindən diqqətdə saxlanılır.
Bu yaxınlarda isə federasiya tərəfindən Naxçıvan Muxtar Respublikası ümumtəhsil məktəblərində tədris etmək üçün “Şahmat dərsləri” adlı elektron dərslik hazırlanaraq məktəblərə təqdim edilib. Elektron dərslikdə şahmatın sirlərini öyrədən 32 dərs yerləşdirilib ki, bu da şahmatın tədrisini daha da asanlaşdırır. Şahmatın sirlərindən və əsaslarından ibarət olan elektron dərslik şahmatın tədrisində həm müəllimlər, həm də şagirdlər üçün dəyərli mənbə olmaqla, bu fənnin tədrisi səviyyəsinin yüksəldilməsinə müsbət təsir göstərəcəkdir.
Bu gün muxtar respublikanın təhsil ocaqlarında elektron lövhəli siniflərin, kompüter siniflərinin fasiləsiz internetlə təmin olunması imkan verir ki, şahmatın tədrisi üçün nəzərdə tutulmuş elektron dərsliklərdən rahat istifadə etməklə həm müəllimlər, həm də şagirdlər öz bilik və bacarıqlarını inkişaf etdirə bilsinlər.
Naxçıvan Muxtar Respublikası
Təhsil Nazirliyinin mətbuat xidməti
