Dövlət İmtahan Mərkəzi iyulun 7-də 2019-2020-ci tədris ili üçün Azərbaycan Respublikasının ali təhsil müəssisələrinə qəbul olmaq istəyən abituriyentlərə II və III ixtisas qrupları üzrə qəbul imtahanı keçirib.
İmtahan respublikanın 11 şəhərində, ümumilikdə, 57 binada aparılıb. Abituriyentlərə bilik və bacarıqlarını yoxlamaq məqsədilə II qrupda riyaziyyat, coğrafiya və tarix fənləri, III qrupda isə Azərbaycan dili, tarix və ədəbiyyat fənləri üzrə, ümumilikdə, 90 tapşırıq təqdim edilib. Bu imtahanda abituriyentlərin toplaya biləcəyi maksimal ümumi bal 400-dür.
Məlumat üçün bildirək ki, imtahanda 28 min 699 abituriyent iştirak edib. Onlardan 11 min 134 abituriyent II qrup, 17 min 565 abituriyent isə III qrup üzrə imtahan verib.
Həmin gün saat 1600-da Dövlət İmtahan Mərkəzinin “Facebook” səhifəsi və “Youtube” kanalı vasitəsilə canlı yayım edilib və mərkəzin məsul əməkdaşları, ekspertlər tərəfindən imtahanda istifadə olunmuş sualların düzgün cavabları və test tapşırıqları ilə bağlı geniş izahat verilib.
Naxçıvan Muxtar Respublikasında imtahanlar 7, 14 nömrəli və Heydər Əliyev adına tam orta məktəblərdə keçirilib. 1532 abituriyentin iştirak etdiyi imtahana 143 nəzarətçi, 12 imtahan rəhbəri cəlb edilib.
Nəticələrin iyulun 22-də elan olunması nəzərdə tutulur.

 Güntac ŞAHMƏMMƏDLİ